Жақында Еуропалық Одақ вакцинаға қатысты даулы жағдайға тап болды. AstraZeneca вакцина өндірушісі тамыз айында келісілген 300 млн доза вакцинаны Еуроодақ елдеріне жеткізе алмайтынын мәлімдеген.
Оның үстіне компания реттеуші органдардың мақұлдауынан кейін тағы 100 млн вакцина беру мүмкіндігін қарастыруға уәде берген. Алайда өндірістегі қиындықтарға байланысты уәде етілген вакцина көлемі Еуропаға жетпейтін секілді. Наурызға дейін 100 млн доза вакцина алуы керек болған ЕО енді оның тек төрттен бірін – 25 млн дозасын алуы мүмкін. Одақ жетекшілері компаниямен жасалған келісімшартты жариялау арқылы AstraZeneca-ға қысым көрсеткісі келгенімен, вакцина өндірушісі Нидерланд пен Бельгия зауыттарындағы қиындыққа байланысты уәдесін орындай алмайтынын айтқан.
Осыған байланысты Еуропалық Одақ қатаң сынға қалды. Жазға дейін халықтың 70 пайызын вакциналауды мақсат еткенімен, шын мәнінде, өзге дамыған елдермен салыстырғанда ЕО көш соңында келеді. Жалпы, басқалармен салыстырғанда вакцина мәселесінде одақ асығыстық танытпаған. Мәселен, Ұлыбритания алғашқы COVID-19 вакцинасына 2 желтоқсанда рұқсат берген. Ал ЕО бұл әрекетті тек ай соңында қабылдаған. Осылайша, вакцинаға рұқсат берудің өзі ұзаққа созылған. ЕО елдеріне вакцинаның жетпеуі кеш жасалған келісімшарттармен де байланысты болуы мүмкін. Ұлыбритания, АҚШ, Израиль және басқа да елдер вакцина өндірушілерімен келісімге әлдеқайда ерте келіп қойған. ЕО басшылығының кеш әрекеті байқаусыз қалмады.