KEGOC компаниясы Қазақстан қор биржасына жалпы құны 8,6 млрд теңгені құрайтын 8,9 млн дана облигациясын сәтті орналастырды. Оның жылдық орташа кірістілігі – 11,6161 пайыз.
Құнды қағаздар KEGOC-тың жалпы көлемі 80 млрд теңге болатын екінші облигациялық бағдарламасы облигацияларының бірінші шығарылымы аясында орналастырылды. Өтеу мерзімі – 14,3 жыл. Сауда-саттық нәтижесінде тарту көлемі бойынша облигациялардың 22,6 пайызын брокерлік-дилерлік ұйымдар, 72,8 пайызын басқа институционалдық инвесторлар, 4,6 пайызын өзге де заңды тұлғалар сатып алды.
Тартылған қаражат «KEGOC» АҚ филиалдарының 220-500кВ әуе желілерін жаңғырту», «Қазақстан Біртұтас электр энергетикалық жүйесі Батыс аймағының электр желісін күшейту» инвестициялық жобаларын іске асыруға бағытталады.
«Әуелік электр жеткізу желілерін жаңғырту электр желілерінің сенімді жұмыс істеуін қамтамасыз етеді. Сондай-ақ электр энергиясын тұтынушылар шығындарының көлемін оңтайландыруға мүмкіндік береді. Бұдан бөлек, KEGOC қызметінің тиімділігін арттырады. Жаңа электр желілік нысандарды салу есебінен Қазақстанның Біртұтас электр энергетикалық жүйесінің Батыс аймағындағы тұтынушыларды электрмен жабдықтау сенімділігі артады», деп хабарлады компания.
Сондай-ақ құрылыс-монтаждау жұмыстары кезінде қосымша жұмыс орындары пайда болатындықтан, жобалардың әлеуметтік маңызы зор. Бұл өз кезегінде экономиканың нақты секторының дамуына, халықтың жұмыспен қамтылуының және әл-ауқатының жоғарылауына, бюджетке түсетін салықтық төлемдердің артуына оң әсер етеді.