Автоөнеркәсіп саласының жұмыскері дегенді естіген жанның көз алдына ең алдымен ер адамның сұлбасы көлбеңдеп тұра қалатыны рас. Алайда Қостанайдағы машина жасау зауытында отандық автокөлік құрастыруға үлкен үлес қосып жүрген арулар аз емес.
Раушан Байбатжанова жеті жылдан бері Қостанайдағы «Сарыарқаавтопром» серіктестігінде автокөлік шанағын сырлаушы, әрлеуші болып жұмыс істеп келеді. Раушанның күнделікті міндеті – сырлау цехынан жаңа шыққан көліктердің сыртқы қабатын тегістеп, айнадай етіп жылтырату.
– Көпшілігі әрлеу жұмыстары көлік шанағының сыртын жылтыратып, бояуын ашу үшін ғана жасалады деп түсінеді. Негізінде, шанаққа жұққан сыр мен лак қабатында жай көзге көріне қоймайтын кедір-бұдыр көп болады. Мен осыларды әбден тегістеп, автокөлік шанағын ұзаққа дейін сыры кетпейтіндей етіп жылтыратып шығарамын, – деді шанақ әрлеуші.
Раушан «Сарыарқаавтопром» серіктестігіне алғаш келген жылы сырлау цехында үш-төрт-ақ қыз-келіншек бар еді. Кәсіпорын басшылығы отандық көліктерді сырлап, әрлеу барысында ерлерден гөрі әйелдерге көбірек сенім артатын болса керек, қазір олардың саны жиырмаға жеті. Мұнда небары бес-ақ ер адам жұмыс істейді. Цех бригадасы бір ауысымда 18 көлік шанағын әрлеп шығарады.
– Еңбекақымыз жаман емес, зауытта тегін тамақтанамыз. Мұның сыртында, жұмысқа қызметтік автобуспен келеміз. Үйге де осы автобуспен қайтамыз. Сырлау цехындағы жұмысымыз да қызық. Әдетте жай адамға жаңа сырланған автокөліктің сырты мінсіз әрі теп-тегіс болып көрінуі мүмкін. Ал мен сырт адамдар байқай бермейтін нәзік кемшіліктерді көріп қоя беремін. Шанақтың сыртқы тегістігін саусақпен сезіне білу керек. Автокөлік те әйел сияқты, екеуі де сұлулықпен үйлесіп тұрады, – деді Раушан.
Өз кәсібінің хас шебері әрі аяулы ана Раушан Байбатжанова таяуда Қостанай облысының іскер әйелдер қауымдастығы ұйымдастырған байқаудың жеңімпазы атанды.
Қостанай облысы