Түркістан облысында өз еркімен коронавирусқа қарсы екпе қабылдаған 13 мыңға жуық тұрғынның 10 674-і медицина қызметкері болса, 1276-ы педагог. Сондай-ақ 444 полиция қызметкері мен 75 басқада санаттағы азаматтар бар. Ал 3264 адам екінші компонентпен вакцина салдырды. COVID-19-ға қарсы вакцинациялау 20 емдеу мекемелерінде жүргізілуде.
Бүгінде өңірде эпидемиялық жағдай тұрақты. Соңғы тәулікте Түркістан облысында 6 адамда COVID-19 індеті расталған. Тәуліктік өсім – 0.16%. Жалпы облыста пандемия белең алғалы 574 400 ПТР- сынамалары алынған. Облыстық қоғамдық денсаулық басқармасының басшысы Марат Пашимовтың баяндауынша, соңғы тәулікте зертханаларда 2758 адам тексерілген. Жұқпалы аурулар ауруханасында барлығы 610 орын бар, олардың 478-і бос. Облыстағы мекемелерде 8 оттегі станциясы, 400 ӨЖЖ аппараты, мыңнан аса оттегі аппараты бар. Екі айға жететін дәрі-дәрмек қоры жасақталған, 40-тан астам дәрі қоймасы, 800-дей дәріхана жұмыс істейді.
Айта кетелік, өңірде жалпы 23429 медицина қызметкері бар. Оның 5000-нан астамы дәрігер, қалғандары орта буын мамандары. Ақ халатты жандардың мінсіз қызметі арқасында өңірде қауіпті індетті жұқтырған 4292 науқас толық жазылып шыққан. Жалпы, пандемия басталғалы COVID-19 инфекциясы расталған 4445 жағдай тіркелген. Олардың 2849-да ауру симптомсыз өткен.
Түркістан облысы