Байзақ аудандық тарихи өлкетану музейінде үш мыңнан аса жәдігер бар. Сондағы кітаптар қорында тіркелген мына бір «қызыл кітап» өзінше ерекше. Ерекше дейтініміз – ол әрі құнды, әрі ескі дүние.
1937-38 жылдары баспадан шыққан кітапта әйгілі жыршы Жамбыл Жабаевтың өлеңдері топтастырылған. Айта кетерлігі, ұлы ақынның «Ленин мавзолейінде», «Орден алғанда», «Халықтан сәлем», «Одақтас», «12 декабрь», «Ұлыма», «Балаларға», «Алатау» және тағы басқа шығармалары латын әріпінде жазылған. Кітап музей келушілеріне осынысымен де қызық.
Қазақ халық поэзиясының әйгілі тұлғасы, өлең сөздің дүлдүлі Жамбыл Жабаевтың туғанына биыл 175 жыл. Ел өміріндегі жетістік пен жаңғыруларды, жеңіс пен ерлікті айрықша шабытпен жырлаған ақынның өлеңдері ағылшын, болгар, чех және әлемнің басқа тілдеріне аударылған дейтін болсақ, латын әріпінде жарияланған осынау ерекше кітапты музейге ауданымызға қарасты Жаңатұрмыс ауылдық округі Ақшолақ орта мектебінің мұғалімі Рахманов Төлжан Төлегенұлы сыйға берген.
«Кітап – сарқылмас рухани қазына. Жақсы кітап жан дүниемізді нұрландырып, жүрегімізді айнадай жарқыратады. Ал мынадай ұлы тұлғаның туындысы тек менің үйімдегі сөреде емес, көпшілік көретін жерде тұруы тиіс деп шешіп, аудандық музейге табыстаған болатынмын. Әсіресе, кейінгі жас ұрпақ көп кітап оқыса екен», дейді ұлағатты ұстаз.
Айдана ШОТБАСОВА,
Байзақ аудандық тарихи-өлкетану музейінің қор сақтаушысы
Жамбыл облысы