«Астана Опера» театрының труппасы карантин кезінде халықты өрелі өнерлерімен үнемі қолдап, демеп отырды. Солистер сондай күрделі кезеңде өздерінің жан дүниесін толқытқан әсерлерімен бөлісіп, шығармашылықты дамытуда жаңа бір формаларға барғандығын баяндады.
– Қандай да бір оқиғаға баға беру үшін алдымен уақыт қажет. Елімізді шырмаған індеттің басталғанына да бір жылдан асты. Содан бері халқымыз коронавирус сынағына тайсалмай төтеп беріп келеді. Осындай қиын шақта театр ұжымы да қарап отырмады, бірнеше рет қолдануға болатын қорғаныш маскасын тігуді бастап, алғашқылардың бірі ретінде елорда тұрғындарына көмек қолын созды. Балет әртістері мен вокалистер Мәдениет және спорт министрлігі жасалған жобаларға, дәлірек айтқанда министр Ақтоты Райымқұлованың бастамасымен жүзеге асқан « Карантиндегі жұлдыз» тележобасына қатысты. Қатаң карантин жеңілдетілгеннен кейін театр айтулы премьераларды қойып, барша көрерменге сый жасады, − деп атап өтті «Астана Опера» театрының директоры, Қазақстанның еңбек сіңірген қайраткері Ғалым Ахмедьяров.
Ал «Астана Опера» опера труппасының басшысы, Қазақстанның еңбек сіңірген қайраткері Азамат Жылтыркөзов күшейтілген карантин кезінде онлайн-жобалар көрермендерді ғана емес, сонымен бірге орындаушыларды да құтқарып қалғанын, әсіресе өнерпаздардың шығармашылығын шыңдауға әсері болғандығын айтты.
Сондай-ақ Талғат Мұсабаев, Медет Чотабаев, Жұпар Ғабдуллина, Жаннат Бақтай, Салтанат Ахметова, Евгений Чайников, Бағдат Әбілханов секілді талантты өнерпаздар театрдың жүрегі сахна екендігін айта келіп, карантин жеңілдетілгеннен «Дон Паскуале», «Махаббат сусыны», «Дала үні» қойылымдарының премьералары, көптеген жаңа концерт пен симфониялық бағдарлама әртістер мен көрермендердің жүрегіне үміт отын жаққандығын жеткізді.
Бір жағынан карантин балет әртістеріне де оңай тимеді, олар үшін дайындықсыз өткізген бір күннің өзі жұмыссыз екі аптаға пара-пар деуге болады.
– Дене қимыл-қозғалыстың жоқтығын бірден сезеді, үй жағдайында жасалған жаттығу залдағы толыққанды сабақты алмастыра алмайды. Дағдыға айналған жұмыс тәртібімізге бірден кірісіп кету оңай болмады. Сондықтан спектакльдерде өнер көрсету, тіпті көрермендердің шектеулі санына премьералар қою мүмкіндігі болғанға қуандық. Балет әртісінің шығармашылық ғұмыры қысқа, сол себепті біз үшін әр күніміз бен сағатымыз аса маңызды. Еңбегіміздің ерекшелігін түсініп, зейнетке ерте шығу жасын қайтарғаны үшін министрлігіміздің басшыларына алғысым шексіз, енді төлемдер алу үшін 20 жыл жұмыс істеу жеткілікті, – дейді «Астана Операның» жетекші солисі, Қазақстанның еңбек сіңірген қайраткері Бақтияр Адамжан.
Сонымен бірге бекзат өнер ордасының музыкатанушысы Маржан Жәкенованың айтуынша, Мәдениет және спорт министрлігі Нұр-Сұлтан қаласы әкімдігімен бірлесіп іске асырған «Театр сабағы», сондай-ақ балалар үйінің тәрбиеленушілеріне арналған бірқатар қайырымдылық акция мен концерттік жобаның маңызы да зор.