Бұл көне жәдігер Қостанай облысы Амангелді ауданындағы, халық батыры Амангелді Иманов атындағы мемориалдық мұражайында тұр. Оны музейге Тілеулі батырдың ұрпағы, соғыс және еңбек ардагері Тайжан Батырбеков қария 1986 жылы өткізіпті.
Мұражай басшысы Сахан Төленовтің айтуынша, айбынды батырдың қанжары XVIII ғасырға тиесілі, жасалуы да ерекше, техникасы – металл, ағаш, құйма болып келеді. Ұзындығы – 45,6 см құрайды. «Тайжан ақсақал – Тілеулі батырдан тарайды. Сондықтан құнды мұра ол кісіге арғы аталарынан мирас болып қалыпты», дейді ол.
Тілеулі Әбдірахманұлы – 1723 жылы Талас өзені және Бұланты-Білеуті, Аңырақайда болған жоңғарлармен шайқастарда қыпшақ қолын бастаған. Батыр туралы заңғар жазушы Әбіш Кекілбайұлы: «Ұзын Қыпшақ Тілеулі Әбдірахманұлы жоңғар қалмақтарымен болған шайқастардан кейінгі бейбіт кезеңде де бес қаруын белінен шешпеген. Бұл – сол кездегі батырлардың бәрінің басында болған жайттар. Ол Есетпен бірге жүріп, үнемі елдің мазасын алып, жиі жаугершілікке ұшыратып отырған құба қалмақтармен, башқұрттармен, ноғайлармен, түрікмендермен, орыс-казактарымен шайқасқан. Бабаларымыздың сол қайсарлығы, ерлігі арқасында Маңғыстау түбегі, Жайық бойы мәңгі атақонысымыз болып қалды» деп жазыпты.
Бабамыздың ұрпақтары да ата даңқына сай болған. Батырдың кіндігінен тараған бір ұлы, Абылай ханның беделді кеңесшілерінің бірі – Нияз би. Оның зираты елорда іргесіндегі Тайтөбе ауылында орналасқан.Сонымен бірге 1916 жылғы Торғайдағы ұлт-азаттық көтеріліс көсемдерінің бірі Әбдіғапар Жанбосынұлы да ерен ердің ұрпағы саналады.
Тілеулі бабамыз Ақтөбе қаласынан 18 шақырым жердегі Бестамақ деген елді мекендегі Тама Есет батырдың жанына жерленген.