Құрлықтық хоккей лигасының (ҚХЛ) 2021/2022 жылдардағы маусымының жарыс кестесі бекітілді. Бәсекелер әдеттегідей екі кезеңнен тұрады, деп хабарлайды Egemen.kz.
Тұрақты біріншілік барысында әр команда «үйдегі» және «түздегі» ойынды қоса алғанда барлығы 56 кездесуден өткізеді. Ол жарыс биылғы жылдың 1 қыркүйегінде басталып, келесі жылдың 1 наурызында өз мәресіне жетеді. Тұсаукесер кездесуде Омбылық «Авангард» пен Мәскеудің ЦСКА клубтары күш сынасады. Сондай-ақ 2022 жылы Бейжіңде алауы тұтанатын XXIV қысқы Олимпия ойындары кезінде екі апталық үзіліс жариялау жағы да қарастырылған.
Естеріңізге сала кетейік, ғаламдық дода 4-20 ақпан аралығында ұйымдастырылады деп жоспарланып отыр.
Алғашқы сынақтан сүрінбей өткен командалар плей-оффқа жолдама алады. Гагарин кубогы жолындағы жарыс 4 наурызда басталады. Ал айтулы доданың ең үздік командасы сәуір айының соңғы күндері анықталады.
ҚХЛ-дың былтырғы маусымы «Авангард» клубының жеңісімен аяқталғаны еді. Финалда алты ойынның қорытындысы бойынша ЦСКА-ны 4:2 есебімен ұтқан омбылық хоккейшілер Гагарин кубогын олжалады.