Бүгін Жоғары еуразиялық экономикалық кеңестің отырысында Тұңғыш Президент – Елбасы Нұрсұлтан Назарбаев жиынның барлық қатысушыларына пандемияға қарамастан, ұйымға мүше елдердің экономикасында ілгерлеушілік бар екенін айтты, деп хабарлайды Egemen.kz.
«29 мамырда Еуразиялық экономикалық одақ туралы келісімшартқа біздің елдің астанасында қол қойғанымызға 7 жыл толады. Бүгінде бірлесіп күш жұмсаудың арқасында ЕАЭО әлемнің экономикалық сәулетінен жүйелі орын алғанын әсірелеусіз айтуға болады. Соңғы бес жылда елдеріміздің өзара саудасы 21 пайызға өсіп, 2020 жылы 55 млрд долларға жетті. Бұл дағдарыс жағдайындағы көрсеткіш. Әйтпесе біз одан да үлкен жетістіктерге жете аламыз», деді Елбасы.
Сонымен бірге Ұлт көшбасшысы пандемия жағдайында одақ аясындағы байланыстардың беріктігі сынақтан өтіп жатқанын еске салды.
«Коронавирус пандемиясымен келген экономикалық дағдарыс біздің интеграциялық бірлестігіміздің беріктігінің сынағына айналды. Қауіпсіздік мәселесі бірінші орынға шығып отыр. Бұл азық-түлік, дәрі-дәрмек, цифрлық және қаржылық инфрақұрылым сияқты бірнеше саланың кең ауқымын қамтиды», деді Н.Назарбаев.