Иә, Алаш десе кеудені мақтаныш керней ме, қанатын қомдаған бүркіттей арқалана қаламыз. Өйтпегенде ше, Алаш мемлекетін құрамыз деп бастарын бәйгеге тігіп, тәуелсіздік жолында құрбан болған бабалардың батырлығы ұмытылмайды. Кеше облыстық Өнер музейі «Алаш арыстары» атты көрме ұйымдастырды.
Халықаралық музей түні аясында ұйымдастырылған шараға өңірдің суретшілері бір ай бұрын білек сыбана кіріскен. Байқау болғандықтан, бәсеке бар. Бір-бірінен асып түсуге тырысты. Қайраткерлерді әр қырынан бейнеледі. Талап графика жанрында болған соң шеберлер тушь, гуашь, акварель сынды тәсілдерді қолданды.
– Тәуелсіздігімізді асқақтату үшін оның тарихын тереңірек білуіміз керек. Біліп қана қоймай, әр қырынан насихаттағанымыз дұрыс. Биыл біздің музей қазақ зиялыларының бейнесін жас ұрпаққа танытуды көздеп, сурет байқауын ұйымдастырды. Тамаша-тамаша туындылар келіп түсті. Музей көрермендеріне Алаш арыстарын әр қырынан көруге мүмкіндік туып отыр, – дейді музей қызметкері Есенбол Нақтыбайұлы.
Тәуелсіздіктің отыз жылдығымен қатар келген Әлихан Бөкейханның 155 жылдығын, Алаш арыстарын музей қызметкерлері назардан тыс қалдырмағаны қуантты.
Байқауға облыстың әр өңірінен 17 қатысушы өз туындыларын ұсынған. Жалпы саны 30 жұмыс музей төрінен орын алды. Байқау болған соң отыздың ішінен жүлдеге ілінген шеберлер ақшалай сыйлыққа ие болды. Өнер музейі ұйымдастырған шараға демеушілік жасаған ЕКМ СОМPANY ЖШС директоры өнер өрісінің кеңейе түсуі үшін аянып қалмайтынын айтты.
– Өнерге қолдау көрсету – әр азаматтың парызы. Біз берген бәйге өнердің өлшемі бола қоймас. Байқауға қатысқан үміткерлердің туындыларын көріп талантты жастардың өсіп келе жатқанына көз жеткіздік. Біз бұл музеймен біраз уақыттан бері серіктесе жұмыс істеп келеміз. Әлі де өнер жолындағы іс-шараларға қолдау көрсететін боламыз, – деді ЕКМ СОМPANY ЖШС директоры Мақсат Асанұлы.
Шығыс Қазақстан облысы