Осыдан 40 жылдай бұрын кешегі «Социалистік Қазақстан», бүгінгі «Egemen Qazaqstan» басылымы фототілшілер арасында байқаулар ұйымдастырып, елді елең еткізген суреттер топ жарып жүрді.
Қазір республикаға белгілі фототілші Болат Омарәлиев кезінде фотоэтюдтермен әуестеніп, көп уақытын соған жұмсады. Жарты ғасырлық шежіресі бар байқауларда байырғы фототілшінің «аты талай бәйгеден келген». Бүгінде сол тамаша жұмыстардың бірінің тарихын баяндай кетудің реті келіп тұр. Естелікті ақын Асқар Кіребаев бөлісті.
«Ол кезде аудандық газетте істейміз. Бір күні біздің үйден түскі ас ішіп отырғанда мен Болатқа: «Сен фотоэтюд түсіргіш болсаң, саған бір-екі сюжет беремін. Соны түсіріп алсаң, елден озасың», дедім әзілдеп.
Шай ішіп болған соң төрт жасар үлкен ұлым Шыңғыстың қолына домбыра ұстатып, диванға отырғыздық. Болат фотоаппаратын дайындап отыр. Әшейінде домбыраны қолына ұстап отыра қалатын балам бұл жолы Болаттан ұялды ма, қырсықты да қалды. «Шыңғыс, өлең айт, мынаны айт, ананы айт», деп жалынып жатырмын, болмайды.
Дағдарған кезімде мұның еркелігін өзіне пайдаланайын дедім де, «Шыңғыс, Болат ит қой», деп айқайла дедім. Қиқайып отырған бала құлпырып сала берді. Өзі диванда, домбыра қолында, көзі жұмулы, әлгі сөзді айқайлап қоя берсін. Мен тағы айт деп көтермелеймін, ерке балаға бір ермек табылды. Ал мұндай сюжетті іздесе де таба алмайтын Болат бала ит демек түгіл, шошқа десе де қарайтын емес, мұрны пысылдап, жан-жағынан сартылдатып түсіріп жатыр.
Обалы не керек, Болаттың өзі де суреттің пірі ғой, әдемі фотоэтюд төрт жасар бала ән шырқап отырғандай шықты. Кейін 1979 жылы «Соцалистік Қазақстан» газеті «Бес жылдық және біз» фото бәйгесін жариялады. Күн сайын, жыл аяғына дейін фотобәйгенің суреттері жарияланып тұрды.
Байқауға мыңдаған суретпен жүздеген фототілші қатысты. Болат бас бәйгені «Ән салайын әуелетіп» деген осы суретімен жеңіп алды.
«СҚ» жігіттері біледі. Газет шығып кеткеннен кейін онда жарияланған суреттердің түпнұсқасы көпке дейін сақталады. Содан «СҚ» хатшылығына жазушы Асқар Сүлейменов барып қалмай ма? Әлгі сурет қызықты композициясымен Асекеңнің көзіне оттай басылып, қолына алып:
– Жігіттер, мына сурет қайдан? – деп сұрайды.
– Қызылордадан. Болат Омарәлиев дейтін штаттан тыс тілшіміздің дүниесі.
– Олай болса, осы бала не Иранбектің, не Асқардың баласының суреті. Тіпті басқа әйелінен тапса да, сол екеуінің баласы депті де, суретті қалтасына салып алыпты.
Бұл сурет Асекең академиялық театрда әдебиет бөлімінің меңгерушісі болған кезінде, біраз жыл жақтауға салынып, ілулі тұрды», деп еске алады ақын Асқар Кіребаев.