Данияр Елеусінов кәсіпқой боксқа ауысқаннан кейін Қазақстан құрамасының жаңа капитаны ретінде бапкерлер алқасы бірауыздан Әділбек Ниязымбетовті тағайындаған болатын. Осы жөнінде ұлттық құраманың бас жаттықтырушысы Мырзағали Айтжанов өз пікірін білдірді. Бұл туралы sports.kz хабарлады.
«Әділбектің кандидатурасын Василий Левит ұсынған еді. Ниязымбетов осы міндетке лайық деген пікірге келгендіктен, қабыл алдық. Себебі, тәжірибесі де, жетістіктері де көп, сондай-ақ әріптестерінің арасында беделі де жоғары. Бұл жауапкершілікті Токио Олимпиадасына дейін лайықты атқаратынына сенімдімін Оның басты міндеті – қиын кезде командаға жігер беріп, ауызбіршілікті одан әрі нығайту», – деді Мырзағали Айтжанов.
Айта кетейік, жаңарған бокс құрамасы 25 қаңтарға дейін Дүниежүзілік бокс академиясында жалпы физикалық дайындық жиынын өткізді. Жақын арада олар Венгрия мен Болгарияда өтетін дәстүрлі турнирге қатысады. Ал 6-20 ақпан күндері академияда АҚШ, Германия боксшыларымен бірге жаттығады.