Павлодарда фирманың қаражатын күйеуінің шотына аударып отырған ЖШС бухгалтеріне қатысты тергеу жүргізіліп жатыр, деп хабарлайды Egemen.kz.
Облыстық ПД баспасөз қызметінің мәліметінше, ЖШС есепшісі фирманың қаражатын отбасылық қажеттілікке жұмсаған. Оның міндетіне бухгалтерлік құжаттарды орындау, тауарларға тапсырыс беру, тауарларға ақы төлеу, қызметкерлерге жалақы есептеу кіреді.
«Ол ай сайын фирманың 300-400 мың теңге көлеміндегі ақшалай қаражатын күйеуіне тиесілі карточкалық шотқа аударған және картаны өзі пайдаланған. Ал басшылыққа жалған шот-фактуралар ұсынған.
Аталған факті бойынша ҚР ҚК 189-бабы, 3-бөлігіне сәйкес сотқа дейінгі тергеу жүргізілуде», деді полиция департаменті бастығының тергеу жөніндегі орынбасары Рашад Өтеуов.
Талдау қортындысына сүйенсек, көп жағдайда қылмыстық құқық бұзушылықтың бұл түрін кассирлер, бухгалтерлер, қойма меңгерушілері, дүкен сатушылары, экспедиторлар, сарапшы бағалаушылар жасайды. Басшылық ұзақ уақыт бойы аудит жүргізбейді, өйткені олар жұмысшылардың адалдығына сенім артады. Дегенмен, кей жағдайда қоластындағы жұмысшылары үмітті ақтамайды.
«Сеніп тапсырылған бөтен мүлікті иемдену немесе ысырап еткені үшін Қазақстан Республикасы Қылмыстық кодексінің 189-бабы бойынша қылмыстық жауапкершілік көзделген. Полиция кәсіп иелеріне өз кәсіпорындарында, фирмаларында мезгіл-мезгіл түгендеу мен аудит жүргізуге кеңес береді. Сондай-ақ тауарлар мен материалдарды сақтау орындарынында бейнекамералар орнатқан дұрыс», дейді Рашад Өтеуов.
Айта кетерлігі, жыл басынан бері полицияда бөтен мүлікті талан-таражға салудың 29 фактісі тіркелген.