Донор болу – үлкен дәреже

ДДҰ бұл күні дүние жүзін­дегі үкі­меттер мен ұлттық денсау­лық сақ­тау ор­гандарын қан орта­лықтарын тиісті ресурс­тармен қам­тамасыз етуге және ерік­ті, өтеу­сіз қан донорлығын кеңей­­туге арнал­ған жүйе мен ин­фра­құры­лым­­ды құру үшін негіз қалып­тастыруға шақы­­рады.

Қауіпсіз қан және оның ком­по­ненттері медициналық кө­мек пен қо­ғам­дық денсаулық сақтаудың маңыз­ды құрамдас бөлігі екені белгілі. Мұн­дай жұмыс миллиондаған адамның өмі­рін құтқарумен қатар көптеген па­циенттің өмір сапасын арттыруға мүм­кіндік береді. Сон­дықтан мұқ­таж болған әр адамның қауіпсіз қан­ға қол­же­тімділігін қам­тамасыз ету үшін бар­лық мемлекетте қан­ды тұрақты және ерік­ті түрде тап­сыру­ға дайын донорлар болуы керек.

Сovid-19 пандемиясы қан қыз­метінің жұмысына, қозғалыстың шектелуіне әсер еткеніне және өзге де қиыншылақтарға қарамастан, Қазақ­стандағы және басқа да мемлекетті қан донорлары мұқтаж пациенттер үшін қан тапсыруға келуді тоқтатқан емес. Биылғы Дүниежүзілік донор күнінің ұраны – «Қан тапсырыңыз, жер бетіндегі өмір тіршілігі жалғассын!». Бұл планетада пандемия патшалық құрып тұрған уақытта бұрынғыдан да өзекті, бұрынғыдан да маңызды іс екені анық. Сондықтан донор­лардың жер бетіндегі адам өмірін құт­қаруға және өмір сапасын арт­тыруға пейілі індетпен күресте жеңіс­ке жетудің бір жолы десек, артық емес.

ДДҰ биылғы науқанда қауіпсіз қан қорын қамтамасыз етуде жастардың рөліне ерекше назар аударып отыр. Көп­­теген елдегі жас­тар ерікті қан донор­­лығы арқылы қауіпсіз қан қорын қам­­тамасыз етуге бағытталған іс-шара­лар мен бастамаларға белсенді түр­де қаты­­сады. Біршама елдегі халықтың ай­рық­­ша бөлігін идеалист, ынталы және шығар­машылық қуатқа ие жас­тар құрайды.

Бір айта кететіні, жыл сайын елімізде 200 мыңнан астам адам қан тапсырады, оның ішінде 18 мыңға жуық донор – үш және одан да көп рет қан тапсырушы. Өтеусіз донорлар, еріктілер, елордалық ұйымдар мен кәсіпорындардың ұжымдары өтеусіз донорлықтың дамуына ерекше үлес қосуда.