Президент Қасым-Жомарт Тоқаев денсаулық сақтау министрі Алексей Цойды қабылдады, деп хабарлайды Egemen.kz.
Кездесуде Қасым-Жомарт Тоқаевқа Қазақстандағы қазіргі санитарлық-эпидемиологиялық ахуал және тұрғындарға екпе салу барысы туралы есеп берілді.
Министрдің айтуынша, жалпы еліміздегі ахуал тұрақты, өткен айлармен салыстырғанда індет жұқтырғандардың саны екі есе қысқарған. Республика бойынша өлім-жітім көрсеткіші 2 аптаның ішінде 1,6 есе төмендеген. Өңірлердегі эпидемиологиялық ахуалдың жақсаруына байланысты ауруханаларда ем алып жатқан науқастардың саны азайған.
16 маусымдағы жағдай бойынша Мемлекет басшысына ұсынылған мәліметтерге сәйкес COVID-19 індетіне қарсы вакцинаның бірінші компоненті 2 миллион 587 мың адамға, екінші компоненті 1 миллион 480 мың адамға салынған. Күн сайын шамамен 80-100 мың адамға екпе егіледі. Өңірлерде вакцина тапшылығы жоқ. Вакцина кестеге сәйкес жеткізіліп жатыр.
Қасым-Жомарт Тоқаев халықты вакциналау мәселесіне назар аударып, өңірлер бойынша аталған бағыттағы жұмыстарды күшейтуді тапсырды.
Президент екпе егу коронавирус індетін еңсерудің бірден-бір жолы екенін еске салып, халықты Қазақстанда қолжетімді вакциналарды белсенді түрде салғызуға шақырды.
Мемлекет басшысы дәрігерлерді қорғау мәселесіне арнайы тоқталды. Оның пікірінше, медицина қызметкерлерінің құқықтық және әлеуметтік тұрғыдан қорғалуы әлі де төмен деңгейде қалып отыр. Осы орайда дәрігерлердің мәртебесін айқындаудың және оларды ынталандырудың кешенді жүйесін енгізу қажет.
Қасым-Жомарт Тоқаев Алексей Цойға медицина қызметкерлерінің мәртебесін қолдау жөніндегі заңнамалық бастамаларды пысықтауды тапсырды.