Қызғылт құм. Алып аңғар. Ертегі пішінді қамалдар. Елдің көзіне түсуге қорқатын ғажайып сайлар. Аңызға жүк болған алып мекеннің бір бұрышы. Ақиқатын ешкім аршып ала алмасы анық. Себебі миллион жыл бұрын жерді жарып шыққан табиғаттың көркем суреті адамзаттан айласын асырып тұр. Кер даланың төсін қанша кемірсе де енді пенде атаулы мұндай туынды тудыра алмасы ақиқат.
Белгілі суретші Андрей Латыниннің «Шарын. Қамалдар жазығы» картинасы бізді Шарын шатқалына қайта сапарлағандай күйге бөледі. Музейде орналасқан бұл жәдігерді шетелден саяхаттап келген қонақтар таңдана да, таңырқай да қарайтыны көпке мәлім. Көркем картинаға қазақ даласының барлық болмысы сіңгендей.
АҚШ-тағы Гранд-Каньон туралы бәрі біледі, бірақ соған ұқсас табиғи жаратылысты Қазақстаннан да көруге болатынын бірі білсе, бірі білмесі хақ. Алматы қаласынан 200 шақырым қашықтықта орналасқан құтты мекенді америкалық шатқалдың «інісі» деп те атайды. Жетісудың орта бөлігінде мыңжылдықтар жұмбағын ішіне бүгіп даңқы алысты шарлаған Шарынның жас-шамасын нақты атап берген ешкім жоқ. Шөкпелі жыныстардан құралған табиғи ескерткіштің жасы шамамен 12 миллион жылға барады. Жасыл жазықтың ортасынан ашылған жұмыртқадай пайда болған қызғылт айлақ.
Картина реализм стилімен тау пейзажы жанрында майлы бояумен жазылған. Суретші шатқалдардың әрбіріне ерекше мән беруге тырысқан. Әрқайсысына жеке-жеке мағына беріп, кенеп бетін түрлі реңкке толтырған.
Біздің көз алдымызда ғажайып тау сілемдері, уақыт пен жел тілімдеген жартастар, беймәлім үңгірлер, қуаң дала және бұлтты көгілдір аспан астында осылардың арасымен ағып жатқан өзен келеді. Суретші көк түс арқылы көлеңкеге басымдық береді. Бұл картинаға әсер беріп, жоса, құм сияқты жылы тау түстері мен шатқалдың көлеңкелі жақтарының арасына қарама-қайшылық жасайды, әрі шуақты күнді ерекше сезіндіреді.
Суретші туындысында Қазақстан табиғаты құла даласы да, ормандары да, шатқалдары да бар соншалықты алуан түрлі әрі сан қырлы екенін көрсетеді.