Отыз жылдық тарихы бар жасампаз мемлекетіміздің құрылымында полицияның қызметі орасан зор.
Еліміздің тыныштығын сақтау, азаматтардың конституциялық құқықтары мен бостандықтарын және мемлекет пен қоғамның мүддесін қорғау жолындағы тәртіп сақшыларының еңбектерін екі ауыз сөзбен жеткізе алмасымыз анық.
Қазақстан полициясы өзінің құрылған күнінен бастап қоғамдық тәртіп пен азаматтардың қауіпсіздігін қамтамасыз ету бойынша міндеттерін табысты жүзеге асырып келеді. Бұл қызметтің қауіп пен қатерге толы екенін түсіну үшін бір ғана деректі келтіре кетейік. Тәуелсіздік жылдары қызметтік міндеттерін орындау кезінде 800 полиция қызметкері қаза тауып, 2 655 тәртіп сақшысы жарақаттанған. Әрдайым антына адал болып, ел қорғаны деген атаққа абыройлы қызмет етіп жүрген тәртіп сақшыларының әр күні тәуекелге толы екенін осыдан-ақ аңғаруға болады.
Бүгін 23 маусым – кәсіби мереке күні полиция қызметкерлерінің күнделікті тыныс-тіршілігінен хабар берер аға буынның ақ батасы мен осынау қырағы мамандықты таңдаған жастардың игі тілегін беруді жөн санадық. Тілек бір – полиция қатары міндетіне адал, абыройы биік, ерлігі елеусіз қалмайтын білікті мамандармен көбейе берсін.