Түркістандық дәрігерлер шала туған үшемді аман алып қалды. Жыл басынан бері өңірде алтыншы үшем дүниеге келді. Облыстық қоғамдық денсаулық сақтау басқармасының мәліметінше, нәрестелер Түркістан қаласында орналасқан №3 облыстық перинаталдық орталықта дүниеге келді.
Үш ұл баланы 39 жастағы Дилхумар Юсупова ота арқылы босанған. Дәрігерлер туғанда салмағы небәрі 1,7 кило шамасындағы үш ұлды 13 күн бойы күтіп, жетілдірген. Мерзімінен ерте туған үшем перзентхана дәрігерлерінің бақылауына алынған.
Медицина қызметкерлерінің көмегімен сәбилер салмақ қосып, жағдайы жақсарды. Түркістандық дәрігерлердің біліктілігі мен күтімінің, тынымсыз еңбегінің нәтижесінде шала туған шақалақтар аман қалып, аналары оларды бауырына басты.
Мамандардың айтуынша, қазір олардың өміріне төнетін еш қауіп жоқ. Нәрестелерге жақындары Хасан, Хусан және Мухаммад есімдерін берген.
Айта кетсек, үшем дүниеге келген отбасының төрт қызы мен екі ұлы бар. 39 жастағы келіншек 9 баланың анасы атанды. Көпбалалы ана үй шаруасында, ал отағасы – қарапайым жұмысшы.
Былтыр облыс орталығында 10 мыңға жуық сәби, ал жыл басынан бері 6 мың нәресте дүниеге келді. Орталық дәрігерлері жыл сайын жүздеген шала туған нәрестелердің өмірін сақтап қалуда.
Ескендір ЕРТАЙ
Түркістан облысы