Біздің облыста 44 ауылдық деңгейдегі әкімнің тікелей сайлауы 130 елді мекенде өтті. Үміткер болып 168 адам ұсынылды. Олардың 59-ын саяси партиялар ұсынса, 109-ы – өзін өзі ұсынғандар
– Ауыл әкімдерін сайлау күні 140 сайлау комиссиясы жұмыс жүргізді. Оның 14-і – аумақтық, 126-сы – учаскелік. Сайлаушылардың дауыс беруге келуі туралы ақпарат сағат 10.00-нан кешкі 20.00-дейін аумақтық сайлау комиссиясының интернет парақшаларында орналастырылады, – деді брифингте облыстық аумақтық сайлау комиссиясының төрайымы Гүлнәр Аманжолова.
Оның айтуынша, сайлау алдындағы үгіт кезеңінде облыстық, аумақтық комиссияларға, соттарға кандидаттарының құқықтарына қысым жасау жөнінде ешқандай шағым түспеген.
Індеттің таралуының алдын алу үшін дауыс беруге келген тұрғындар арасында әлеуметтік қашықтықты сақтау қадағаланды.
Байқаушылар республикалық «Партиялық емес бақылау» қоғамдық ұйымының филиалында дайындықтан өткен.
Сағат 12-дегі жағдай бойынша өз дауыстарын берген сайлаушылар саны 50 пайызға жуықтаған. Соның ішінде Екібастұз, Ақсу қалаларының ауылдық аумақтарында сайлаушылардың 50 пайызға жуығы, ал Ертіс ауданында тұрғындардың 65 пайызы дауыс беріп үлгерген.
Кенжекөл ауылындағы №50 сайлау учаскесінде ауыл әкімдігінен үміткер 5 адам тіркелген екен. Оның үшеуі – саяси партиялардың атынан, екеуі – өзін өзі ұсынғандар.
– Қандай әкім келсе де дұрыс жұмыс керек. Облыс орталығына жақын тұрған Кенжекөл ауылы үшін, біріншіден, қоғамдық көліктердің аздығы – үлкен мәселе. Екіншіден, бір ғана Вeeline мұнарасы бар, байланыс дұрыс ұстамайды. Үшіншіден, кейбір тұрғындар қаражаттың тапшылығына байланысты су құбырын үйге дейін кіргізе алмай отыр, – дейді зейнеткер Ерғазы Макин.
Павлодар облысы