Өкінішке қарай, Жетісуда коронавирус індетінің таралуы күн сайын өсіп келеді. Облыс қазір «қызыл аймақ» санатына кірген. Алайда шектеу шараларының күшеюі мен алдын алу жұмысына қарамастан ауырып, емханаға түсіп жатқан адам саны азаймай отыр. Мәселен, өткен тәулікте 311 науқастан вирустың оң белгісі анықталып, инфекциялық ауруханаға жатқызылған екен.
Қазір облыста 33 024 адамның коронавирус инфекциясын жұқтырғаны зертханалық тексеру барысында расталып отыр. Яғни соңғы бір апта ішіндегі індет жұқтырудың өсу көрсеткіші 1 пайызды құраған. Ал анықталған 311 науқастың елді мекендерге шаққандағы үлесіне назар аударсақ, негізінен адам көп шоғырланған әрі Алматы қаласымен қоян-қолтық араласып жатқан аудандарда басым екені білінеді. Демек тұрғындар қауіпсіздік шараларын сақтамаудың зардабын шегіп отыр деген сөз.
Дерек бойынша, өткен тәулікте ғана Ақсу ауданында – 6, Алакөл ауданында – 4, Балқаш ауданында – 4, Еңбекшіқазақ ауданында – 29, Ескелді ауданында – 4, Жамбыл ауданында – 18, Іле ауданында – 34, Қарасай ауданында – 32, Қаратал ауданында – 8, Көксу ауданында – 5, Панфилов ауданында – 12, Райымбек ауданында – 2, Талғар ауданында – 36, Ұйғыр ауданында – 11, Кеген ауданында – 3, Қапшағай қаласында – 14, Талдықорған қаласында – 76, Текелі қаласында 13 адамнан коронавирус инфекциясы анықталып, науқастар медицина көмегіне жүгінген.
Айтпақшы, өңірде коронавирусқа қарсы екпе алу ісі қарқынды жүріп жатқанымен, тұрғындардың тиісті бөлігі әлі де вакцина салдыруға асығар емес. Дерекке сүйенсек, жыл басынан бері облысқа вакцинаның бірінші компонентін егу үшін 570 655 доза екпе әкелінген болса, оның 551 350 доза екпесі ғана қолданылыпты. Ал вакцинаның екінші компонентінен 516 990 доза облыстағы медицина ұйымдарына әкелінген. Бүгінге дейін оның 383 422 дозасы егілген. Яғни екпенің екі компонентін алған осы 383 422 адамға вакциналау паспорты берілген. Айтпақшы, вакциналанғандардың арасында мемлекет қызметшілерінің үлесі 11 849 адам екен, сондай-ақ 23 338 медицина қызметкері мен тағы басқа 38 036 қызметкер бар. Ал вакцинаның бірінші компонентін алғандар саны 551 352 адам шамасында. Екпе алу ісі баяу да болса, жалғасып жатыр.
Алматы облысы