Облыс әкімі Гүлшара Әбдіқалықова Токио Олимпиадасына қатысқан қызылордалық спортшылар Қамшыбек Қоңқабаев, Дәулет Ниязбеков және Мөлдір Жаңбырбаймен кездесті.
Аймақ басшысы Сыр жұртшылығы атынан өңір тарихында алғаш рет бокстан олимпия ойындарының қола жүлдесін алған Қамшыбек Қоңқабаевты құттықтап, Дәулет Ниязбеков пен Мөлдір Жаңбырбайға ел намысын аянбай қорғағандары үшін алғысын айтты.
– Екі апта бойы облыс халқы аламанға үкілеп шығарып салған үміттерінің тілеуін тілеп, жанкүйер болды. Алыс сапарға, жауапты жарысқа аттанған ұл-қыздарымыз сенімді ақтады. Ал Қамшыбектің алтынға бергісіз қола жүлдесі талай балдырғанның қиялына қанат бітіріп, Сыр халқының көптен күткен арманын жүзеге асырды.
Ел Президентінен Мемлекеттік Туды алып, әлем мықтылары бас қосқан сайыста ұстап шығу қашанда үлкен мәртебе, зор сенім. Бұл міндетті жерлесіміз Қамшыбек Қоңқабаев абыроймен ақтап, байрағымызды Олимпиада төрінде желбіретті, – деді облыс әкімі.
Биыл аймақ спортшылары көптеген жарыстардан олжамен оралды. Жыл басынан бері жерлестеріміз ел біріншіліктерінде 700 медаль жеңіп алса, әлем, Азия чемпионаттарында 46 медальға қол жеткізді.
Кездесуде облыс әкімі ел намысын абыроймен қорғап шыққан Қамшыбек Қоңқабаевқа автокөлік кілтін табыстаса, бапкері Сейітжан Төкенов, Олимпиада ойындарының қатысушылары Дәулет Ниязбеков пен Мөлдір Жаңбырбай 1 млн теңгенің сертификатын иеленді.
Елдің рухы мен мәртебесін көтерген спортшыларға «Dalatex» ЖШС басшысы Ділмұхамед Абизов, «Нұрлен» ЖШС жетекшісі Қайрат Боранбаев, «Мелиоратор» серіктестігінің директоры Бердібек Мыханов пен «Стандарт Ойл КЗО» компаниясын басқаратын Әділ Бижанов секілді меценат азаматтар демеушілік жасап, қолдау көрсетті.
Шарада Спорт күні кәсіби мерекесіне орай №4 олимпиадалық резервтің мамандандырылған балалар мен жасөспірімдер мектебінің жаттықтырушысы Владимир Лептиков пен Қ.Мұңайтпасұлы атындағы спорт клубтың директоры Жамал Бозоваға Мәдениет және спорт министрлігінің төсбелгісі мен Құрмет грамотасы табысталды.
Олимпиаданың қола жүлдегері Қамшыбек Қоңқабаев пен жеке бапкері Сейітжан Төкенов спортшыларға көрсетілген қолдауға ризашылығын білдіріп, алда да жерлестер сенімін ақтауға күш салатынын айтты.
Сондай-ақ жиында ауыр атлетикадан 4 дүркін әлем чемпионы, Қазақстанның еңбек сіңірген спорт шебері Илья Ильин Қамшыбекті жеңісімен құттықтап, Мөлдір мен Дәулетке алдағы сайыстарда сәттілік тіледі және әріптестеріне кәсіби мерекелеріне орай тілегін арнады.
Қызылорда