Әлиді азулы қарсылас күтіп тұр

 Гватемаланың солтүстігінде орналасқан Эль-Петен депар­таментіне қарасты Сан-Бенито қаласының тумасы алғашында әуесқойлар арасында елеулі та­быстарға қол жеткізді. Елішілік жа­рыстарда қарсылас шақ кел­тір­меген Лестер 2012 жылы жас­өспірімдер арасындағы әлем бірін­шілігінің күміс жүлдегері атан­ды. Ақтық сында ол кубалық Ке­вин Брауннан ұтылды. Осы­лайша, Мартинестің есімі әлем бірін­шіліктерінде жүлде алған тұң­ғыш гватемалалық боксшы ре­тінде тарихта қалды.

Жастар буыны арасындағы жарыста жасындай жарқылдағаннан кейін Лестер ұлттық құрама сапына ілігіп, Орталық Америка ойындарында оза шапты. Екі рет әлемдік додада бақ сынады. Алайда бұл жарыстарда жолы болмады. Екі рет Панамерика біріншіліктерінде өнер көрсет­ті. 2015 жылы ширек финалда Олим­пиада және әлем чемпионы кубалық Рониель Иглесиасқа жол берсе, 2017 жылы қола медальді мойнына ілді. 75 кило салмақта күш сынасқан ол бастапқы бәсе­келерде барлық қарсыласын сы­пыра ұтып, ширек финалда бра­зилиялық Эберт Консейсан Соузаны сан соқтырды. Ал дәл осы боксшы биыл Токиода алауы тұтанған Олимпия ойындарын­­да айды аспанға бір-ақ шыға­рып, алтын тұғырға көтерілгені бар­шамыздың есімізде. Айтулы жарыста Консейсан біздің Әбіл­хан Аманқұл мен ресейлік Глеб Бак­шиден басым түссе, шешуші бә­секеде украиналық Александр Хижнякты нокаутқа жіберді. Дәл сол Соузадан ұтылған бокс­шы­лардың барлығы да әр жылдары әлем чемпионаттарында же­ңіс тұғырына көтерілгенін жан­күйерлер жақсы біледі.

Десек те Лестерге Панамерика біріншілігінде бас жүлдені олжалау бақыты бұйырмады. Тегуси­гальпада өткен жарыстың финалдында ол әлем және құрлық біріншіліктерінің жеңімпазы, Олимпиада чемпионы Арлен Лопестен ұтылды. Куба қабы­ланына жіберген есесін ол 2018 жылы Орталық Америка және Кариб бассейні ойындарында қайтарды. Финалдық сайыста екі мықтының жолы қайта қиысып, бұл бәсекеде Мартинестің мысы басым болды.

Гватемала боксшысының бас­ты арманы Токио Олимпиа­да­сына қатысу еді. Бірақ Жапо­ниядағы жарыс бір жылға кейін шегерілгеннен кейін Лестер кә­сіп­қойлар арасында күш сына­суды құп көрді. Осы орайда ол өзін нағыз панчер ретінде мо­йындатты. 2019 жылдың көк­тем айларынан бері тоғыз рет шаршы алаңға көтерілген Мар­ти­нес барлық бәсекеде айқын ба­сымдық танытты. Бір кере­ме­ті, ол қарсыластарының денін бел­гі­ленген раундтардың бел орта­сына жеткізбей сұлатып салды. Оны­мен ең ұзақ айқасқан Габ­риэль Лопес екен. Биыл 3 сә­уір­де Мексиканың Лос-Мочис қала­сында өткен жекпе-жек­те Лестер жергілікті боксшыны төр­тінші раундта есінен тандырды.

Ал 26 жастағы Әли Ахмедов­тің жүріп өткен жолы көз алдымызда. Алматы облысындағы Іле ауданының тумасы әуесқой рингте де өзін жақсы қырынан көрсетті. Білікті бапкер Сағатбек Мұсахановтың қол астында жат­­тыққан ол Қазақстан чем­пио­­натының қола жүлдегері, сту­дент­тер арасында әлем чемпионы және бірқатар халықаралық турнирдің жеңімпазы атанды. Әлидің кәсіпқой рингте өнер көр­сетіп жүргеніне алты жылға жуық­тады. Сол аралықта 17 кездесу өткізіп, 16 рет жеңіске жетті. 12 қарсыласын нокаутпен ұтты.

Былтыр желтоқсан айында Ахмедовтің IBF нұсқасы бойын­ша әлем чемпионы атануға тамаша мүмкіндігі болды. АҚШ-тың Флорида штатында өткен жекпе-жекте ол аса тәжірибелі эк­вадорлық Карлос Гонгорамен жұдырықтасты. Бұл жекпе-жекте Ахмедов әлдеқайда алымды көрінді. Бәсеке тізгіні біздің боксшының қолында болды. Ол ұпай санымен алда келе жатты. Алайда 12 раундта жерлесіміз Гон­гораның ауыр соққысын жі­беріп алды. Сақа спортшы қар­сы­ласының сәл босаңсыған сә­тін қалт жібермеді. Осы соққы­дан кейін Әли есін жия алмады. Нокаут!

Соңғы жекпе-жегіндегі сәтсіз­дігіне қарамастан, осы салада жүрген майталман мамандар­дың дені Әли Ахмедовтің әлеуеті зор деп есептейді. Боксшының өзі де жоғарыдағы жағдайды кездейсоқтық дейді. Сол себеп­ті де ол алдағы кездесу­лер­ге тыңғылықты даярланып, қайт­сем де көздеген мақсатыма қол жеткіземін деп құлшынып отыр. Ал Әлидің көздегені – әлемдік тәж!