Түркістан өңірінің тұрғындары жаңа оқу жылында білім беру процесі дәстүрлі форматта жүргізілгенін қалап отыр. Оған облыстағы эпидемиялық ахуал да, мектептердегі дайындық та мүмкіндік беретіні айтылуда. Жаңа 2021-2022 оқу жылында Түркістан облысы бойынша 927 күндізгі орта білім беру ұйымында 516 740 оқушы оқиды деп күтілуде. Барлық білім ошағында санитарлық нормалардың сақталуы ерекше назарға алынып, қажетті дезинфекциялық құрал-жабдықтармен қамтамасыз етілген.
Бүгінде білім беретін 83 897 педагогтің 71 809-ына (85,6%), техникалық персоналдардың 27 560-ына (96,6%) вакцина егілген. Бұл көрсеткіш 100%-ды құрайды. Биыл ата-аналардың өтініштерімен 47 266 бала бірінші сыныпқа қабылданды. Жаңа оқу жылына жалпы саны 2 млн 250 мың дана оқулық сатып алуға 4,8 млрд теңге қаржы бөлінген.
Сонымен қатар тамыз айының басында оқулықтардың тасымалынан үнемделген қаржыға, оқушылар санының өсіміне байланысты барлық сыныпқа жетіспейтін және ескі оқулықтарды жаңарту үшін 826,1 мың дана оқулық алынуда. Бұл орайда 17 баспамен оқулықтарды сатып алу және тасымал бойынша келісімшарт жасалған. Оқулықтардың тасымалы 25 тамызда толығымен аяқталады.
Табиғи өсімі жоғары өңірде мектеп құрылысы да қарқынды жүргізілуде. Нақтырақ айтсақ, биыл облыс бойынша жалпы 78 мектеп, оның 70-і облыстық бюджеттен, 8-і «Ауыл – ел бесігі» жобасы аясында салынып жатыр. Бұдан бөлек Түркістан қаласында 720 орындық Назарбаев Зияткерлік мектебі салынуда. Облыстық адами әлеуетті дамыту басқармасының басшысы Рақымбек Жолаевтың мәлімдеуінше, құрылысы жүргізіліп жатқан 78 мектептің 15-ін бірінші қыркүйекте, 44-ін жыл соңына дейін пайдалануға беру жоспарланған. Өңірде 6 апатты және 4 үш ауысымды мектеп бар. Биыл 2 апатты және 1 үш ауысымды мектептің мәселесі шешіледі. Айта кетелік, Nur Otan партиясының «Өзгерістер жолы: Әр азаматқа лайықты өмір!» атты сайлауалды бағдарламасына сәйкес 2025 жылға қарай өңірде 130 мектеп салу жоспарланған. Биыл бағдарлама аясында жалпы 47 мектеп құрылысы жоспарланған. Оның 17-сі 1 қыркүйекке пайдалануға беріліп, қалғаны жыл соңына дейін ашылады деп жоспарлануда. Сондай-ақ облыс бойынша 12 мектептің күрделі жөндеу жұмыстарына 2,8 млрд теңге қаржы қарастырылған. Бес мектепте жөндеу жұмыстары тамыз айының соңында аяқталса, қалған алтауы жыл соңына дейін пайдалануға беріледі. Бір мектептің жұмысы келесі жылы бітеді. Сонымен қатар жергілікті бюджет есебінен 18 мектепке 86 млн теңгеге ағымдағы жөндеу жұмыстары жүргізілді. Ал 100-ге жуық мектептің асханаларын жөндеу, 108 мектептің кітапханаларын жаңғырту жұмыстары қолға алынған.
Оқушылардың қауіпсіздігін қамтамасыз ету мақсатында облыста 900 мемлекеттік мектеп толығымен бейнебақылау жүйесімен қамтамасыз етілген. Облыстағы білім ордаларын мамандандырылған күзет пен «Дабыл батырмаларымен» қамтуды кезең-кезеңімен шешу жоспарлануда. Былтыр 756 мектепті ішкі әжетханалармен қамтамасыз ету жоспарланған. Өткен жылы – 679, биыл 20 мектептің ішкі әжетханалары ретке келтірілді. Қалған 57 мектептің мәселесі 1 қыркүйекке дейін толығымен шешілмек. Жылу маусымына дайындық та белгіленген кесте бойынша жүргізілуде. Өңірдегі жылу маусымына дайындық жұмыстарына сәйкес 1 279 білім нысанын гидравликалық сығымдаудан өткізу жұмыстары 88%-ға орындалған. Білім беру мекемелерін 107 мың тонна көмір және 3,5 мың тонна сұйық отынмен қамтамасыз ету жоспарланған. Облыс әкімдігінің хабарлауынша, қазіргі таңда тасымалдау жұмыстары 40%-ға орындалған.
Орта білім беру ордалары да жаңа оқу жылына дайындық жұмыстарын пысықтауда. Жаңа 2021-2022 оқу жылына орта білімді кадрларды даярлауға 52 мамандық бойынша 6 мыңнан аса орынға мемлекеттік грант берілді. Оның жартысынан астамы білікті жұмысшы кадрларды, қалғаны орта буын мамандары мен қолданбалы бакалавриат мамандарын даярлауға бағытталған.
Мемлекет басшысы Қасым-Жомарт Тоқаевтың колледждердің техникалық және кәсіптік білімге көшу мәселелеріндегі стратегиялық бағдарларды айқындай отырып, дамытуды кешенді қарау жөніндегі тапсырмасына сәйкес өткен жылдың басынан бастап Түркістан облысында 10 жылға сатып алу құқығынсыз 3 мемлекеттік колледжді сенімгерлік басқаруға беру туралы шешім қабылданған болатын. Байқау нәтижесі бойынша 3 басқарушы компания анықталды. Жаңа басқарушы компаниялар студенттерді сапалы біліммен және жұмысқа орналастырумен қамтамасыз ету бойынша өздеріне міндеттемелер алды. Сенімгерлікке берген колледждерде нәтиже байқалуда. Бүгінде дуалды оқыту форматы қолданылып, оқытудың 40%-ы теория, 60%-ы тәжірибе түрінде жүргізілуде. Студенттер шәкіртақыдан басқа, нақты өндірісте тәжірибеден өтіп, жалақы алуда. Сала мамандары студенттердің сабаққа қатысуы 95%-ға дейін артып, заңсыз төлемдер қысқарғанын, оқытушыларға өндірістік тәжірибеге қатысқаны үшін қосымша төлемдер ұлғайтылғанын айтуда. Жұмысқа орналасқан түлектердің үлесі 90%-ға дейін өскен. Білім және ғылым министрлігі тарапынан келісім берілген жағдайда, биыл тағы да 10 мемлекеттік колледжді сенімгерлік басқаруға беру қарастырылған. Сондай-ақ сенімгерлік басқаруға ұсынылған техникалық және кәсіптік білім беру колледждері «Жас маман» жобасына енбек.
Түркістан облысы