Мұнайлы өңірдің Ресеймен шекарадағы Құрманғазы ауданында Мақаш ауылдық округі бар. Ауылдың үш мыңнан астам тұрғыны қайырымдылық іс-шарасынан шет қалмайды. Қазақы болмыстың осынау қағидасына берік мақаштықтар Маңғыстау облысына қол ұшын созды.
– Атырау мен Маңғыстау – ежелден қоңсы қонған, төскейде малы қосылған өңірлер. Бұрын бір облыстың құрамында да болды. Табиғаты да, экономикасы да бір-біріне ұқсас. Алайда биыл көршілес Маңғыстаудағы қуаңшылық төрт түлікке қиын болып тұр. Бұл біздің де жанымызға батты. Сол себептен, біздің ауылдың азаматтары маңғыстаулықтарға көмек ретінде 30 тонна орама шөп жіберуге бастама көтерген еді. Біздің бұл бастамамызға ауданның, ауылдық округтің әкімдері қолдау білдірді, – дейді ауыл тұрғыны Жеңіс Әбілхайыров.
Оның айтуынша, орама шөпті дайындауға Мақаш ауылдық округінің Жалғас Симон мен Есболат Құбашев бастаған 40-тан астам тұрғыны, «Мақаш» өндірістік кооперативі, үш шаруа қожалығы атсалысты. Олар 25 күнде әрқайсысының салмағы 300 келіні құрайтын 100 орама шөп дайындап, көрші облысқа жіберді.
Атырау облысы