Сомали астанасындағы президент сарайының жанында көлік жарылып, 8 адам қаза болды. Әл-Каидаға байланысы бар әл-Шабаб террорлық тобы жауапкершілікті өзіне алып, жарылыстың қасақана ұйымдастырылғанын мойындады.
Жарылыс болған аймақ президент сарайы мен әуежайды байланыстыратын жол екен. Сомали полициясы өкілі Абдифатах Аден Хасан жаралылар мен қаза болғандар саны әлі де артуы мүмкін деген болжам айтты. Өйткені жарылыстан кейін көп уақыт өтпей, жараланғандарды туыстары оқиға орнынан үйлеріне алып кеткен. Қазір зардап шеккендердің нақты саны анықталып жатыр.
«Әл-Шабаб ұйымдастырған шабуыл кем дегенде 8 адамның өліміне себеп болып отыр. Олардың қатарында әскери қызметші, ана мен кішкентай 2 сәби бар. Әл-Шабаб бейбіт халықты өлтірді», деді полиция өкілі.
Содырлар президент сарайына өтетін негізгі бақылау бекетін көздеген деген ақпарат бар. Жергілікті БАҚ «әл-Шабаб теоррористік тобы билікті өз қолына алып, өз тәртібін орнатқысы келеді» деп жазды.
Аталған топ 2011 жылға дейін елдің бас қаласын бақылауда ұстаған. Одан кейін Африка одағының қарулы күшінен жеңіліп, кейін шегінуге мәжбүр болған. Дегенмен, ауылдық жерлерді әлі де бақылауда ұстап, мемлекеттік және азаматтық нысандарға шабуыл жасап тұрады.
Оқиға куәгерлерінің айтуынша, полиция қызметкері көлікті тоқтатқан. Іле машина бірнеше секундтің ішінде жарылып үлгерген.
«Полиция көлікті тексеру үшін тоқтатты. Бұл қалыпты тексеріс қой. Көлік тоқтай салысымен жарылды. Ал жанында бейкүнә адамдар отырған басқа да көліктер болды», дейді оқиға орнында болған Мұхаммед Хасан.
Үкіметтің баспасөз қызметі мерт болғандар арасында Премьер-министрдің адам құқықтары бойынша кеңесшісі Хибак Абукар барын хабарлады.
Премьер-министр Хусейн Робле кеңесшісінің үлкен үміт күттіретін жас маман болғанын, адал әрі шыншыл адам екенін айтып, жақындарына көңіл білдірді. Одан бөлек, Сомали халқына терроризммен бірлесіп күресуіміз керек деген үндеу жолдады.