Кәсіпкерлік негіздерін мектепте игереді

Т.Құлыбаев еңбек нарығына шығатын дайын кәсіпкерлердің үлесін арттыру қажеттігіне тоқталды. Сондықтан бұл пәннің маңызын атап, ұстаздардың атқарып жатқан еңбегіне алғыс айтты.

«Сіздер оқытып жатқан балалар кәсібін бастап, елге қызмет ете алады. Отбасына жағдай жасап, жаңа жұмыс орындарын ашады. Сондықтан бұл бүгінге керек жұмыс. Еліміз жас, мектепте 3 млн-ға жуық бала оқиды. Жақын уақытта 3,5 млн-ға жетеді. Колледж бен университеттерде білім алатын млн-ға жуық студент бар. Яғни жыл сайын еңбек нарығына шығып, немен айналысатынын білетін адам саны артып келеді. Мемлекет ел экономикасындағы шағын және орта бизнес үлесін 50 пайызға жеткізу керек деген тапсырма қойды. Себебі тұрақты дамыған мемлекет болу үшін осындай көрсеткішке жету керек», деп атап өтті Т.Құлыбаев.

Нұр-Сұлтан қаласының №1 мек­теп-лицейінде білім беретін Гүлнара Кәрімованің оқушылары сабаққа қатысқанды ұнатып қана қоймай, сонымен қатар кәсіпкерлік бойынша олимпиадалар мен конкурстарға қатысады. Олардың кейбірі өз ісін де ашқан. 5starseducation DALA School балаларды дамыту орталығы – жоғары сыныптың екі оқушысы Тимур Русланов пен Сағида Айтқожинаның бірлескен жобасы. Балалар мектепте бизнес жүргізу негіздері бойынша дағдыларды меңгеріп, кәсіп жүргізіп отыр. Бүгінде жобаның жалпы түсімі – шамамен 5 млн теңге.

«Оқушыларыма сабақ ұнайды. Төрт оқушыдан тұратын команда Оzgeris бизнес-инкубаторында 50 мың теңгенің грантын жеңді. Сондай-ақ 2020 жылы жоғары сынып оқушысы Марсель Мадияров AIFC Finance and Economics Olympiad конкурсында бірінші орынды иеленіп, алтын медаль алды. Болашақта балаларымызды Forbs тізімінен көргіміз келеді», деп бөлісті педагог.

Екібастұздан келген мұғалім Дария Дошимова пән тек оқушыларға емес, сондай-ақ мұ­ғалімдерге де қызықты екенін атап өтті. Ол мектеп оқушылары мен сту­­дент­терді кәсіпкерлік негіздеріне бе­йім­деп, оқытуға көмектесу үшін бейін­ді қауымдастық құруды ұсын­ды. Қауымдастық мұғалімдердің білік­ті­лігін арттыруға тұрақты курс­тар, әдіснамалық қолдауды ұйымдас­тыруға көмектеседі.

«Бұл мұғалімдер үшін өте қажет. Себебі біз болашақ кәсіпкерлерді даярлаймыз. Одан әрі Ұлттық кәсіп­керлер палатасы әрбір оқушының дағдысын дамытып, қаржы алуға, бизнес бастауға мүмкіндік береді. Стартаптың жұмысын сүйемелдейді», деді Д.Дошимова.

Оқытушылар Т.Құлыбаевқа 5-9-сы­нып оқушылары үшін экономика, бизнес және қаржылық сауат­тылық негіздері бойынша мектеп бағдар­ламасына арнайы курстар енгізуді ұсынды. Сонымен қатар ұстаздар үшін біліктілікті арттыру курсын көбейтуді сұрады. Төралқа төрағасы бұл мәселені шешуге уәде берді.

«Біз мұғалімдерді қолдау жағынан бар жағдай жасаймыз. Ұстаздар жылына бір рет қана біліктілікті арттыру курсынан өтеді. Енді Білім министрлігінің ресурстары жетпесе, біз «Халық» қоры арқылы бұл олқылықтың орнын толтыруға тырысамыз. Мұғалімдер жылына бір емес, өзіңіз айтқандай төрт ретке дейін біліктілікті арттыру курсынан өту керек», деді Төралқа төрағасы.

Т.Құлыбаев жобаның болашағы бірінші кезекте оқытушыларға байланысты екенін атап, олар айтқан ұсыныстардың бәрін қабылдай­ты­нын атап өтті. Бұл үшін Білім ми­нистр­лігінің өкілдерімен кездесіп, тиіс­ті шара жүргізілетінін жеткізді.

«Ұлттық кәсіпкерлер палатасы «Кәсіпкерлік және бизнес негіздері» пәнін оқыту қалай жүріп жатқанын жіті қадағалайды. Сіздің тікелей қатысуыңызбен Қазақстанда мектеп партасынан бастап ерекше бизнес-орта қалыптасып жатқанына ризашылығымызды білдіреміз. Бұл ел экономикасы үшін маңызды. Ортақ жұмысымыздың жемісін көріп отырмыз – біліммен қаруланған мектеп оқушылары кәсіпкерлікке батыл қадам басып, бизнесін ашып жатыр. Оның ауқымын кеңейту үшін сіздердің жобаны дамыту және жақсарту бо­йынша ұсыныстарыңызды зерделеп, Білім министрлігімен талқылаймыз», деді Т. Құлыбаев.

Айта кетелік, 2017 жылы мектеп­тер­де «Кәсіпкерлік және бизнес негіздері» пәнін енгізу бойынша қанат­­қақты жоба өтті. «Атамекен» ҰКП мен Білім және ғылым министр­лігі­нің бастамасымен 2019 оқу жылынан бастап еліміздің жалпы білім беретін мектептеріндегі 10-11-сыныптар үшін «Кәсіпкерлік және бизнес негіздері» пәні енгізілді. Пән оқытушылары біліктілікті арттыру курстарынан өтті. 2021 оқу жылынан бастап «Кәсіпкерлік қызмет негіздері» пәні ТжКБ ұйымдары үшін мемлекеттік жалпыға міндетті білім беру стандартына негізгі модульдік пән ретінде енгізілді.

Atameken Aсademy білім беру платформасында «Кәсіпкерлік негіздері» пәнін оқып жатқан оқушылар мен колледж студенттеріне арналған Ozgeris бизнес-инкубаторы және Atameken Stars Стартап жобаларының республикалық онлайн-конкурсы ұйымдастырылды. Аtameken.co онлайн платформасында оқушылар мен оқытушылар үшін «Кәсіпкерлік және бизнес негіздері» пәні бо­йынша видео­сабақтар мен қосымша материал­дар дайындалды.

2019-2021 жылдары «Атамекен» жалпы білім беретін мектептердің 5,2 мың мұғалімі, колледждердің 1,7 мың оқытушысы үшін кәсіпкерлік негіздер бойынша біліктілікті арттыру курстарын өткізді. 2021 жылы мұғалімдерді оқытудың үшінші легі 27 қазан мен 12 қараша аралығында өтеді.