Алматы облысының Қапшағай қаласында көлік апатынан бір адам мерт болды. Тағы алты адам зардап шекті, деп хабарлайды Egemen.kz.
Оқиға орнында түсірілген видео әлеуметтік желіде тарады. «Капшағай трассасында жол апаты, казино маңы», делінген жазбада.
Алматы облыстық Полиция департаменті баспасөз қызметінің мәліметінше, оқиға «Алматы-Өскемен» тасжолындағы Қапшағай қаласында тіркелген.
Алдын ала мәліметтерге сүйенсек, 6 қазан күні сағат 17:00 шамасында «Kia Cerato» көлігінің 21 жастағы жүргізушісі рульге ие бола алмай қалып, алдында келе жатқан «Газель» көлігіне соғылған.
«Салдарынан 6 адам зардап шекті. Олар Қапшағай қаласындағы ауруханаға түсті. Зардап шеккен 27 жастағы ер адам жансақтау бөлімінде көз жұмды. Қазір аталған факті бойынша ҚР ҚК-нің 345-бабы 3-бөлігіне сәйкес тергеу басталды», делінген ведомство хабарламасында.