Сыр бойында халық ауыз әдебиетінің таңдаулы үлгілерін, аңыз-әңгімелер мен батырлар жырының, қисса-дастандардың ел аузындағы нұсқаларын жинақтап, «Сыр өңірінің фольклорлық антологиясы» атты үштомдық шығару қолға алынған. Жуырда осыдан 2 жыл бұрын басталған жоба аясындағы алғашқы том – «Жанқожа батыр» жинағы қолға тиді. Тәуелсіздігіміздің 30 жылдығына арналған тартудың тұсаукесері Ә.Тәжібаев атындағы облыстық әмбебап ғылыми кітапханасында өтті.
Тұсаукесерде облыстық мәдениет, архивтер және құжаттама басқармасының басшысы Асқарбек Есжанов Елбасының «Ұлы Даланың жеті қыры» мақаласындағы «Дала фольклоры мен музыкасының мың жылы» жобасы аясында облыс әкімдігінің қолдауымен жүзеге асқан бастама жайлы тарата айтып, төрт астана ту тіккен өңірдің өткенінен дерек жинаған ғалымдар жұмысына сәттілік тіледі.
Филология ғылымдарының докторы, профессор, Қорқыт ата атындағы Қызылорда университеті «Қорқыттану және өлке тарихы» ғылыми-зерттеу институтының директоры Бағдат Кәрібозұлы жетекшілік еткен жобаның алғашқы кезеңі батырлар жырына арналып, университет ғалымдары мен студенттерден жасақталған экспедиция аудандардан эпостық жырлар, дастандар, жер-су аттарына байланысты мәліметтер мен көне қолжазбалар жинақтаған. Осындай еңбектің арқасында жарыққа шыққан «Жанқожа батыр» жинағына Мұсабай жырау, Лұқпан Кенжеұлы, Қарман Сұлтанұлы, Жекей Шаңғытбайұлы нұсқалары топтастырылды. Аруақты ер жайлы бұл тарихи жырлардың дені бұрын-соңды баспа жүзін көрмеген. Жинаққа батырдың бар өмірін қамтитын жырлардан бөлек ел аузынан жазып алынған аңыз-әңгімелер де енгізіліп отыр.
Кітапханада өткен жиында фольклордың жазба әдебиетпен қатар дамып келе жатқанына тоқталған жоба жетекшісі Бағдат Кәрібозұлы екінші томға аңыз-әңгімелер, ал үшінші томға Сыр сүлейлері жырлаған, сирек орындалатын қисса-дастандар топтастырылатынын айтып өтті.