Алматыда TransLogistica Kazakhstan-2021 халықаралық көрмесі өз жұмысын бастады. Көрмеге Әзербайжан, Беларусь, Грузия, Қазақстан, Латвия, Литва, Ресей, Украина және Эстониядан 80-нен астам компания қатысуда.
Биыл көрмеге келген экспоненттердің 60%-ы шетелдіктер. Сарапшылар бұл халықаралық бизнес қауымдастықтың біздің еліміз ашатын мүмкіндіктерге деген жоғары қызығушылығы мен сенімін көрсетеді деп есептейді. Ауқымды жобаның ашылу салтанатында Индустрия және инфрақұрылымдық даму вице-министрі Берік Камалиев Үкімет басшысы Асқар Маминнің құттықтау хатын оқып берді.
«Қазақстан Еуразия құрлығының маңызды Көлік желілерінің ортасында орналаса отырып, Азия мен Еуропа арасындағы транзиттік көпір мен сенімді серіктес екенін көрсетті. Мұны көрме мен конференцияға қатысушылардың халықаралық құрамы дәлелдейді. «Translogistica Kazakhstan-2021» халықаралық көрмесі транзиттік-көлік әлеуетін дамытуға, ұзақмерзімді және өзара тиімді серіктестік қатынастарды одан әрі нығайтуға үлес қосатынына сенімдімін», делінген құттықтауда.
«TransLogistica Kazakhstan- 2021» көрмесі Орталық Азия өңірінде бизнес әріптестіктің ауқымын кеңейту арқылы жаңа өнімдер мен қызметтерді іске қосу әлеуетін арттырып отыр. Іс-шараға қатысушы тараптар өзара тәжірибе алмасып, транзиттік бағытты одан әрі жандандыру мәселелерін бірлесе талқылады. Пандемия кезеңі көлік дәліздерінің әлеуметтік қажеттілігі мен экономикалық тиімділігінің маңызын көрсетіп берді. Бұл еліміздегі инвестициялық тартымдылықты күшейтуге де ықпал еткені мәлім.
«Қазақстан көлік саласын және көлік дәліздерінің транзиттік әлеуетін дамыту үшін зор күш-жігер жұмсауда. Үкімет пен Индустрия және инфрақұрылымдық даму министрлігі бірқатар салалық бағдарламаны іске асырды, саланың құқықтық негізі қалыптасты, көлік қызметтерін көрсету үшін қолайлы бәсекелестік орта құрылды. Соңғы 15 жылда еліміздің көлік саласына шамамен 35 млрд доллар салынды», деп атап өтті вице-министр Б.Камалиев.
Жүк тасымалдарының кедергісіз өтуі үшін транзиттік дәліздерді жаңғыртуға ерекше көңіл бөлінеді. Бүгінде Қазақстан арқылы 11 халықаралық транзиттік дәліз өтетін болса, оның 5-еуі темір жол және 6-уы автомобиль жолдарына тиесілі. Республикалық, облыстық және аудандық маңызы бар автомобиль жолдарының жалпы ұзындығы шамамен 100 мың шақырым, ал темір жолдың ұзындығы 21 мың шақырымды құрайды.
Қазақстандағы 20 әуежайдың 18-і ИКАО талаптарына сәйкес деп танылған. Биыл 2-11 тамыз аралығында өткізілген ICVM шеңберінде ИКАО ұшу қауіпсіздігінің халықаралық стандарттарына сәйкестік деңгейі (84%-ға дейін) артып отыр. ИКАО-ның объективті бағалауы саладағы реформалардың оң әсерін көрсетеді дейді мамандар.