Әскери қуаттылық –әлеуеттілік кепілі

Әскери қуаттылық – тәуелсіз Қазақстанныңақ сауыты. Біздің тыныштығымыз, дамуымыз, ұлттық және табиғи құндылықтарды сақтауымыз – бәрі осы әскери айбындылықтың аясында өрбитіні анық. Сол себепті елімізде Қарулы Күштерді, қорғаныс саласын дамыту бағытында сүбелі  істер қолға алынып келеді. Оны сырт көз байқай бермес, бірақ сымдай тартылып сапта жүрген әскери қызметшілердің өздері осылай деп отыр. Ақтау қаласындағы Әскери-теңіз институты ғимаратында еліміздің Қарулы Күштері Әс­ке­ри-теңіз күштері Бас қолбас­шылығының жоспарына сай, жаңа Жолдауды насихаттау, түсін­діруге арналған дөңгелек үстел өтті. Мемлекет басшысының «Қа­зақ­стан жолы – 2050: бір мақсат, бір мүдде, бір болашақ» Жолдауының теңізшілер тірлі­гіндегі маяк, яғни шамшырақ, айлақ, жол үсті желі, Каспий теңізі сынды сөздер мен ұғымдармен басталуын «болашақта теңіздің және әскери әлеуетті арттырудың маңыздылығына қатысты» деп санаған әскерилер Жолдауда жүктелген міндеттер мен тапсырмаларды жұмыла орындауға тырыспақ. Осылайша дамыған 30 елдің қатарына әбжіл де әле­уетті әскери күші бар, қуатты ел ретінде енуді көздеуде. – Барлық әскери бөлімшелер мен құрылымдық бөлімшелердің жетекшілері Жолдауды те­рең ұғынып, жүзеге асыру үшін жұмыстануға міндетті. Біз­дің еліміз – ұлан-ғайыр жері бар, Каспий теңізінің қазақ­стандық секторында табиғи байлықтардың мол көзі сақ­тал­ған алып мемлекет. Әскери­лер, жеке құрам әрдайым жауын­герлік дайындықта болып, елдің тыныштығын сақтауға, жауынгерлік шеберлікті же­тіл­діруге, жаңа қарулар түрі­­мен, әсіресе, отандық за­­уыт­­тар­да жа­салған қарулармен жа­рақ­тануға тиіс. Отан қорғаушы ретінде бұл біздің міндетіміз, сон­дай-ақ Елбасы Жолдауын жү­зеге асы­ру да біз үшін міндет, –деді Қа­зақстан Республикасы Қарулы Күштері Әскери-те­ңіз күштері тәрбие және әлеу­меттік-құқықтық жұмыстар бөлі­мінің бастығы, полковник Қ.Мыңжанов. Полковниктің айтуынша, биылғы жылы Каспий теңізі бетінде көк байрақты желбірете, тәуелсіз Қазақстанымызды қорғай жосылтқан әскери кеме­лердің саны тағы бірге артпақ. Ал Әскери-теңіз күштері тыл базасының Ақтау маңынан орын тебуі де керек-жарақ, киім-кешекті алыстан тасу қиын­дығынан құтқаратын болады. Дөңгелек үстел басында сөз алған әскерилер Жолдаудағы басым бағыттарды қуаттап, өз пікірлерін білдірді. Ал Ақтау аудандық пайдалану бөлімінің бастығы Б.Мірсейітов әскери қызметкерлердің әлеуметтік ахуалы туралы баяндады. – 2013 жылы Ақтау гарнизоны бойынша 240 пәтерлі тұрғын үй мен 70 орынды пәтер типті жатақхана пайдалануға берілді. Аз ғана уақытта бүтін әскери қалашық салынды. 800-ге тарта әскери қызметкердің айлық жалақысына пәтер жалдау үшін арнайы өсім қосылып келеді, сондай-ақ, коммуналдық төлемдер үшін жеңілдіктер қарас­тырылған, – деді ол. Одан әрі әскери топ Жолдауды насихаттауды теңіз толқынында тербелген кемелердегі теңізшілер арасында жалғастырды. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.