Облыстық жұмыспен қамтуды үйлестіру және әлеуметтік бағдарламалар басқармасының басшысы Азамат Мәмбетовтің мәліметінше, биыл Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасының бағыттарына 24 032 адамды қамту көзделген. Қазір аталған бағдарламаға 24 348 адам тартылды.
– Бағдарламаның бірінші бағытымен 250 адамды кәсіптік-техникалық даярлау, ал 1 510 жұмыссызды қысқа мерзімді курстарда оқыту жоспарланған еді. Сәуір айында басталған қысқамерзімді оқыту курсына 1 378 адам жіберілді. Оқыту курсын 911 адам аяқтады. Екінші бағытқа сәйкес «Бастау Бизнес» жобасымен 1 мың адамды оқыту, 154 адамға несие және 530 адамға мемлекеттік грант беру кестесі жасақталды. Осы кезге дейін онлайн режімінде 1 015 адам «Бастау Бизнес» жобасымен кәсіпкерлік негіздеріне оқытылып, 223 адам несие мен 531 адам қайтарымсыз грант алды, – дейді Азамат Мәмбетов.
Аталған бағдарламаның үшінші бағытымен 20 581 адамды қамту жоспарланыпты. Оның ішінде 332 адамды әлеуметтік жұмыстарға, 798 жасты жастар тәжірибесіне, 5 313 адамды қоғамдық жұмыстарға, 46 адамды алғашқы жұмыс орындарына, 14 092 адамды бос жұмыс орындарына орналастыру тізбесі бекітілген. Жыл басынан бері жұмыспен қамту орталықтарына 22 576 адам жүгінді. Қазірге дейін 20 864 адам жұмыспен қамтылды. Тұрақты жұмыс орындарына 13 733 адам, уақытша жұмысқа 7 131 адам жіберілді.