Шымкент қаласында сыбайлас жемқорлық сипатындағы қылмыстардың көбі құқық қорғау органдарында, білім, денсаулық сақтау, құрылыс салаларында тіркеліп отыр. Жыл басынан бері Сыбайлас жемқорлыққа қарсы іс-қимыл агенттігі Шымкент қаласы бойынша департаменті 77 қылмысты тіркеген. Оның 63-і сыбайлас жемқорлық сипатындағы қылмыс.
Департамент басшысының бірінші орынбасары Т.Серікбаевтың айтуына қарағанда, тіркелген қылмыстардың басым бөлігін парақорлық және жымқыру фактілері құрайды. «Жымқыру фактілері бойынша – 17, парақорлық фактілері бойынша 48 қылмыс тіркелген. Салалар бойынша анықталған қылмыстардың ең көп саны құқық қорғау органдарында – 20, білім, денсаулық сақтау, құрылыс салаларында 12 қылмыстан тіркелді. Сондай-ақ сыбайлас жемқорлық жасағаны үшін 51 жауапты қызметкер әшкереленіп, 16 адам сотталды. Қылмыстық істерді тергеу шеңберінде мемлекеттік органдарға 49 ұсыным енгізіліп, оның 46-сы қаралған. Нәтижесінде, 24 лауазымды тұлға тәртіптік жауапкершілікке тартылды, оның ішінде 3 қызметкер атқарып отырған лауазымынан босатылса, 5-уі жұмыстан босатылды», деді Талғар Серікбаев соңғы 10 айда атқарылған жұмыстар бойынша берген ақпаратында. Сонымен қатар ол сыбайлас жемқорлықтың алдын алу бағытында азаматтық қоғам институттарымен тығыз өзара іс-қимыл маңызды рөл атқаратындығын мәлімдеді. Бұл орайда «Шымкент – адалдық алаңы», арнайы мониторингтік топ және ақпараттық-ағартушылық штабы тарапынан жүзеге асырылған жобалар оң нәтиже берген. Мегаполис тұрғындарына кеңестер берілетін Antikor Live және Adal Komek жобалары халықты қызықтыратын өзекті мәселелерді талқылау бойынша тиімді диалог алаңына айналған. Жыл басынан бері департамент 10 мекеменің қызметіне талдау жүргізіп, сыбайлас жемқорлық тәуекелдері анықталған. Сыртқы талдаулардың қорытындысы бойынша 100-ден аса ұсыныс енгізіліп, олардың жартысынан көбі орындалды.
Сондай-ақ департамент басшысының бірінші орынбасары бүгінде Шымкентте квазимемлекеттік сектордың 186 ұйымында комплаенс қызметі жұмыс істейтінін айтты. Жыл басынан бері өтініштері бойынша сыбайлас жемқорлық құқық бұзушылықтарының жолын кесуге ықпал еткен 12 адам көтермеленіп, олардың сыйақы мөлшері 2 млн теңгеден астам соманы құраған.