Екі мың жылдан астам тарихы бар көне Тараз қаласының бүгінгі келбеті мен шаһардағы сәулеттік өзгерістер көптің көз алдында. Әсіресе тәуелсіздік жылдары Тараздың түрлену кезеңі болды. Көне қаланың өрнегі артып, өрісі кеңейді.
Тарихи шаһардың бүгінгі келбетін көпшілікке таныту мақсатында Тәуелсіздіктің 30 жылдығына орай, қала әкімдігінің қолдауымен «Түрленген Тараз» республикалық фото-бейне, мобилиография шеберлерінің байқауы ұйымдастырылған болатын. Шаһардың барлық болмысын бір ғана нысанаға сыйдырған шеберлер байқауға «Үздік мобилиограф», «Үздік дрон түсіруші», «Үздік фотограф», «Үздік силуэт», «Ұшпалы сурет» сияқты 15 аталым бойынша қатысқан.
Облыстық тарихи-өлкетану музейінде аталған байқаудың жеңімпаздарын марапаттау рәсімі өтті. Жалпы, байқауға қатысқан 46 адамның ішінен 15 үміткер оза шауып, аталған әр аталым бойынша жеңімпаз атанды. Қатысушылардың әрқайсысы күн санап көркейіп келе жатқан Тараз қаласының бүгінгі кескін-келбетін жан-жақты дүниелері арқылы барынша әсерлі етіп көрсете білген. Нысанаға, әсіресе, көне шаһардың тарихи-мәдени орындары көп ілінген. Сонымен қатар кейінгі кездері мемлекет қолдауының нәтижесінде бой көтерген нысандар да назардан тыс қалмапты. Байқауды ұйымдастырушылардың айтуынша, барлық қатысушы үміткер өзіндік қолтаңбасымен, ойлау ерекшелігімен және көре білу қабілетімен тарихи шаһарды танытуға атсалысқан. Жеңімпаздар мен жүлдегерлерді қала әкімі Ержан Жылқыбаев марапаттап, оларға шығармашылық табыс тіледі.
Жамбыл облысы