Сәл сейілгендей болғанымен, дүркін-дүркін бас көтеріп, дүмеп тұрған жаман тұмаудың жолын кесу жалғыз-ақ екпе алуға байланысты екені мәлім болғалы қашан. Алыпқашты жаяу әңгіме де, әлеуметтік желіде қаптап кеткен екпе туралы теріс пікір де елді алаңдатпай қойған жоқ.
Бір-бірімен жалғаса келіп, жарға соққандай екпінмен ел ішін опыр-топыр еткен тажал аурудың адам талғамайтындығы тағы рас. Алғашқыда ересектер ғана шеңгеліне іліксе, соңғы уақытта жасөспірімдер мен балалардың арасында да жайылып барады. Мәселен, жаңа оқу жылы басталғалы оқушылардың дертке шалдығуының 1 257 оқиғасы тіркелді. Осыған орай аймақтағы 52 мектептің 82 сыныбы қашықтан оқытуға көшірілген. Соңғы тәуліктерде тағы да 8 баланың індет жұқтырғаны белгілі болды. Демек, карантиндік талаптарды бұлжытпай сақтау өз алдына, аузын арандай ашқан жаман тұмаудың бетін қайтару үшін міндетті түрде екпе салдырғаны дұрыс. Балалардың жайы осындай болғанда, індет жоғары оқу орнында да жиі кездесе бастады. Айталық, жаңа оқу жылынан бері орта арнаулы білім ошақтарының 164 білім алушысы, жоғары оқу орындарының 26 студенті дерт қармағына іліккен. Осы арада оқырманның көзін әбден жеткізу үшін тағы бір деректі келтіре кетсек артықтығы болмас. Індет қаулап тұрған өткен жылдың сәйкес мерзімімен салыстырғанда 14 жасқа дейінгі балалардың жаман тұмау жұқтыруы 18, ал 15-17 жас аралығындағы жасөспірімдер 25 есе көбейген. Міне, осы денеңді түршіктіретін дерттің таралуы ойландырмай қоймайды. Мамандардың айтуына қарағанда, бірден бірге тарап, шарасыз адамдарды әбден басынып алған, аямастан шеңгелін салып жатқан жаман тұмауды ауыздықтау тек қана екпе алуға байланысты.
Өңірге қараша айының 18-інде екі компонентті Pfizer вакцинасының 35 мың дозасы жеткізілді. Мектеп оқушыларының арасында екпе алуға ниет білдірушілер аз емес. Ата-аналарының жазбаша келісімі бойынша 727 оқушы екпе алмақ. Облыс орталығында жасөспірімдердің алғашқы тобы вакцина алуды бастап кетті. Облысқа жеткізілген вакцина аудандарға таратылмақ. Алғашқы кезекте 12 мен 17 жас аралығындағы жасөспірімдерді екпемен қамтамасыз ету көзделуде.
Облыс ауруханалары, қосымша жабдықталған мобильді бригадалар қазір жауапты іске дайын. Білім ошақтарындағы медициналық пункттер жабдықталып, медицина қызметкерлері арнайы әдістемелік дайындықтан өткізілді. Жауапты науқанға 830 медицина қызметкері жұмылдырылатын болса, оның 149-ы дәрігер, 681-і орта медицина қызметкерлері.
Ақмола облысы