Қазақстан Республикасы Тәуелсіздігінің 30 жылдығына орай «Менің Туым – менің Отаным» акциясы аясында Әскери-әуе күштері армия авиациясының жауынгерлік тікұшақтары елорда аспанында тәуелсіз еліміздің символы – Мемлекеттік туды қалықтатып ұшырды, деп хабарлайды Egemen.kz.
ӘӘК армия авиациясының бастығы полковник Нұрлан Байдуллаев, авиация базасының командирі полковник Мақсұтбек Әділбаев Ми-171Ш тікұшағымен елорда аспанында Қазақстанның Мемлекеттік туын қалықтатып алып ұшты.
Бұл рәсімді орындау барысында олармен тәжірибелі ұшқыштар мен штурмандар басқарған Ми-17 бұрамалы қанатты тікұшақтар ұшты.
Акцияға қатысуға арнайы іріктелгендер қатарында әскери парадтардың, «КADEX» қару-жарақ пен әскери-техникалық мүлік халықаралық көрмесіне қатысқан әскери ұшқыштар болды.
«Ту – әр мемлекеттің басты символдарының бірі, елдің егемендігі мен біртұтастығының белгісі. Қазақстан халқы үшін маңызды күнді мерекелеу қарсаңында оқу-жаттығу ұшуларын орындау арқылы акцияға қатысуды жөн көрдік», деді Әскери-әуе күштерінің қолбасшысы полковник Нұрболат Топаев.