Егемен елдің Елтаңбасы

Мұнда егемен елдің Елтаң­басын жасаған автор Жандарбек Мәлібекұлының өмір жолы мен шығармашылығы, тың туын­дыларының түпнұсқа жобалары, қолжазбалары мен сүбелі сұхбат­тары, жарияланған еңбектері, фото-бейнематериалдары Тәуелсіздіктің 30 жылдығы, Ұлттық архивтің 15 жылдығы қарсаңында мәңгілік сақтауға алынды.

Салтанатты іс-шараға мемлекет қайраткері, құжаттанушы Мірболат Жақыпов, филология ғылымдарының докторы, профессор Серік Негимов, жазушы Жолтай Жұмат-Әлмашұлы, саяси ғылымдар док­торы, профессор Әбдіжәлел Қош­қар­ұлы, Қазақ ұлттық өнер уни­вер­ситетінің профес­соры Бай­қоңыр Ижанұлы, Қол­жаз­балар және сирек кітаптар ұлттық орта­лығының басшысы Жандос Бол­дықов сынды белгілі тұлғалар қатысты.

Қазақстан Республикасы Ұлт­тық архивінің директоры Са­ғила Есімсейітқызы Ұлт­тық архив­тің жеке тектік қорына қабыл­данған Жандарбек Мәлі­бекұл­ының құн­ды құжаттары мен қолжазба-сызбаларының қаншалықты ма­ңызды екенін айта келіп, Елтаңба авторының үлгі боларлық бас­тамасына алғысын білдірді. «Мем­лекетіміздің Елтаңбасының авторы ретінде ғана емес, көптеген елдегі сәулетті ғимараттардың архитекторы ретінде, қазақ хал­қының санғасырлық сәулет өнерін бойына сіңірген дара тұлға ретіндегі сіздің құнды жазбаларыңыз бен эскиздеріңіз Ұлттық архив қо­рында келешек ұрпаққа аманат ретінде сақталатын болады», деп атап өтті С. Есімсейітқызы.

С.Негимов Елтаңбаның әрбір деталіне тоқталып, киіз үй туралы, жылқының ең алғаш қолға үйретілгені туралы қызықты мәлі­меттерімен бөлісті. Ал Ж.Жұ­мат-Әлмашұлы жуырда Елтаңба авторы Жандарбек Мә­лібекұлы туралы пьеса жазып шыққанын және ол туынды жақын арада ел театрларында қойылатынын сүйін­шіледі. Өз кезегінде салтанат­ты шараға шақырылған мәртебелі меймандар Жандарбек Мәлібекұлының ел біле бермейтін қы­рлары, Ел­таңбаның еліміз үшін ма­ңызы туралы жан-жақты мә­лі­меттерімен бөлісіп, аталған ша­ра­ның мән-маңызын ұлғайта түсті.

Кеш соңында Жандарбек Мәлі­бекұлы Ұлттық архив ұжы­мына алғысын білдіре келе, көзінің қа­ра­шығындай сақтап келген дү­ние­­сін келешек ұр­пақ­қа жеткізер деген үлкен сеніммен табыстап отырғанын айтты.«Тарихты сақ­тайтын архив. Сондықтан ел аға­лары ертеңгі ұрпаққа үлгі болатындай құнды дүниелерін архив қоймаларына табыс етуді қолға алу керек», деді.

Сонымен қатар Ұлттық архив­тің директоры Сағила Нұрла­новаға алғыс ретінде өз жобасымен құйы­лып әзірленген, Елтаңба піші­ніндегі әшекей бойтұмарды сыйлады. Мәңгілік елдің қоржы­нын­да мәңгілікке сақтауға алын­ған бұл алтын қор болашақ ұрпақ­тың отансүйгіштігі мен ұлтжан­ды­лығын оятатын, мақтан ететін рухани мұра деп білеміз.