Еліміздегі эпидемиялық ахуал қайтадан нашарлай бастады. «Омикрон» штамы анықталғалы бері індет жұқтырғандардың қатары күннен-күнге көбейіп жатыр. Өткен тәулікте коронавирус инфекциясын жұқтырған 2 087 жағдай тіркелді.
Бір тәулікте тіркелген індет жұқтыру жағдайының 70%-ға жуығы елордада анықталған. Нақтырақ айтсақ, 9 қаңтарда елордада 1 442 адамның коронавирус жұқтырғаны анықталса, одан кейін Шымкент қаласында 123 жағдай тіркелген. Қалған өңірлерде тіркелген жағдай 100-ге жетпейді. Бұл Нұр-Сұлтан қаласындағы эпидемиялық ахуалдың тым күрделі болып тұрғанын көрсетеді.
10 қаңтардағы эпидемиялық ахуалды бағалау матрицасы бойынша «қызыл аймақта» тек елорда тұр. Ал «сары аймақтағы» Алматы, Шымкент қалаларына енді Атырау облысы қосылды. Қалған өңірлер – «жасыл аймақта».
Бүгінде елімізде 22 064 адам коронавирус инфекциясынан емделіп жатыр. Оның ішінде 3 001 пациент стационарда, 19 063 науқас амбулаториялық деңгейде ем қабылдауда. Індетке шалдыққандардың арасында 186 адамның жағдайы ауыр, 57 пациенттің жағдайы өте ауыр, 38 науқас ӨЖЖ аппаратында жатыр.
Covid-19 таралуына жол бермеу жөніндегі ВАК елордада «Омикрон» штамының таралуына байланысты қаладағы эпидемиялық ахуал күрт нашарлап кеткенін, өткен екі аптада індеттің күніне 80 жағдайы тіркелсе, кейінгі бес күнде аурушаңдық деңгейі 5,5 есеге артып отырғанын хабарлады.
«Бүгінде қалада жаңа жағдайларды тіркеу саны 1 442-ге жетті. Қаңтардың алғашқы 10 күнінде барлығы 4 622 жағдай тіркелді, бұл өткен желтоқсан айының барлық көрсеткішінен 1,7 есеге артық екенін көрсетіп тұр. Өткен жылдың желтоқсан айының соңында жүргізілген молекулярлық-генетикалық зерттеулердің нәтижелері бойынша бір сынамада КВИ-дің іріктелген 25 оң сынамасынан «Омикрон» штамы анықталды. Бұл жағдай 16 желтоқсанда шетелден келген қала тұрғынында анықталды. Ол ПТР тестінің теріс нәтижесімен келді, бірақ 22 желтоқсанда тамақ ауруымен медициналық көмекке жүгінді, содан кейін тексеріліп, оң материалды тексеріске жібердік. Мұндай күрт өсудің негізгі себептерінің бірі – «Омикрон» штамының таралуы және азаматтардың қала бойынша белсенді қозғалысымен байланысты, сонымен қатар сақтық шараларын елемеуі, маска тағу режімін сақтамауы, адамдар көп жиналатын жерлерге баруы. Егер сізде ПТР тесті оң болса немесе сіз науқастармен тығыз байланыста болсаңыз, онда сіз үй карантинінде болуыңыз керек, өйткені сіз басқаларға үлкен қауіп төндіруші екеніңізді ұмытпауды сұраймыз», делінген Covid-19 таралуына жол бермеу жөніндегі ВАК хабарламасында.
Елордалық инфекционист дәрігер Эльмира Әдішева «Омикрон» штамының белгілері туралы айтып берді.
«Коронавирустың «Омикрон» штамы дамудың екінші сатысынан өтіп, барынша жұқпалы, бірақ аз патогенділік деңгейіне жетті деген пікір бар. «Омикронға» қатысты сұрақ әлі көп. Алайда кейбір оған тән симптомдар белгілі. Жаңа штамға тән ерекшеліктердің бірі – ол коронавирустың осыған дейін белгілі болған штамдарына қарағанда, дәм мен иіс сезу жоғалмайды. «Омикронға» тән симптомдар – жалпы әлсіздік, тамақтың ашуы, дене қызуының көтерілуі, дененің қақсап ауыруы мен құрғақ жөтел. Егер осы белгілерді байқасаңыз, бірден дәрігердің көмегіне жүгінгеніңіз жөн. Өздігіңізден диагноз қойып, ем қабылдауға болмайды», деді Э.Әдішева.
Сондай-ақ инфекционист дәрігер жаңа штамды, сонымен қатар коронавирустың басқа да штамдарын жұқтырмауға профилактикалық іс-шараларды сақтау мен вакциналау ғана көмектесетінін алға тартты.
Расында, «Омикрон» штамы ушығып тұрған әлемнің басқа елдерінде коронавирустың бұл түріне шалдыққандардың дені вакцина салдырмағаны айтылып жатыр. Сондықтан вакциналауға самарқау қарауға болмайды. 10 қаңтардағы мәлімет бойынша Қазақстанда бірінші компонентпен 9 014 952 адам, екінші компонентпен 8 551 099 адам вакцина салдырды.