Президент Қасым-Жомарт Тоқаев Nur Otan партиясының съезінде сөйлеген сөзінде, күзде «саяси реформалар бағдарламасы жарияланғаннан кейін, партиядан шығуы ықтимал» екенін жариялады. Бұл дұрыс қадам. Президент Қазақстанның бүкіл халқының мұң-мүддесін қорғауы керек. Ал партия өткен саяси жүйенің қоғамдық-саяси, қаржылық-экономикалық мүдделерін қорғауға бағытталған қоғамдық организм.
Партияда екі жыл ішінде реформа жүріп, праймериз өткізіліп, қоғаммен тығыз байланыс тетіктері жасалды. Осы тенденцияны тереңдету маңызды. Енді Nur Otan партиясының алдында қоғамның, азаматтардың, адамдардың саяси, экономикалық мүдделерін қорғауға қабілетті ұйымға айналу міндеті тұр. Өте ауыр міндет. Осы міндет үдесінен шыға алсақ, партия нақты «парламенттік» реңк алып, прогрессивті ұйымға айналады.
Ол үдеден шығу үшін не істеу керек екендігін партия Төрағасы Қасым-Жомарт Тоқаев жан-жақты айтып берді. Барлық саяси күштерге «Ашық есік» саясаты партияның ең басты құндылығы болуы керек.
Партияға ребрендинг қажет. Атын өзгерту керек шығар. Оны да ойлану керек. Яғни партияның алдында өте күрделі, қиын, қым-қиғашы мол сапар тұр. Партияның интеллектуалдық потенциалы, адами капиталы, ұжымдық санасы осы мақсатқа жетуге қабілетті деп ойлаймын.
Қазақстан Республикасы өзінің саяси тарихында бірінші рет аса күрделі, шұғыл бұрылыстары көп саяси-экономикалық реформаны басынан кешіріп жатыр. Мемлекеттілікті сақтап қалу үшін бұл өзгерістер бақылаудан шығып кетпеуі керек.
Мемлекеттіліктен айырылып қалу бір ғана мезетте екендігін «Қасіретті қаңтар» көрсетті. Қасым-Жомарт Тоқаевтың партия Төрағасы лауазымына келуінің өзі осы логикаға байланысты. Яғни Nur Otan-ның парламенттегі фракциясын пайдаланып, Үкіметке ықпалын күшейте отырып тезірек, экономикалық тиімділікке жету.
Өйткені қазір біздің барлығымызға – халыққа, азаматтарға олардың өмірінің жақсарып келе жатқаны жөнінде нақты «белгі» қажет. Президент – Қазақстанның мемлекеттілігі үшін жауапты бірден-бір тұлға. Бұл өте ауыр жүк! Сондықтан ол кісі жүйелі түрде, бірте-бірте, жан-жағын бағдарлап, он рет ойлана отырып шешім қабылдауы қажет.
Ерлан САИРОВ,
Мәжіліс депутаты