Өңірде жыл басынан бері 10 мыңнан астам адам қатерлі дерттің қармағына ілініп, бұл орайдағы көрсеткіш 6,9 пайызға өскен. Облыстың бас санитарлық дәрігері Айнагүл Мусинаның айтуына қарағанда, сырқаттардың дені – екпе алмағандар.
Соңғы бір тәулікте 976 адамның бойынан қатерлі індет белгілері анықталған. Жұқпалы аурулар стационарларында 642 науқас ем қабылдауда. Үш адамның жағдайы өте ауыр.
– Бүгінде облыс орталығы мен Бурабай ауданында эпидемиялық ахуал өте күрделі, – дейді облыстық бас санитарлық дәрігері, – бір тәулікте облыс орталығында 480, Бурабай ауданында 80 дерек тіркеліп отыр, өзге аудандардағы ахуал да алаңдатарлық.
Білім ошақтарындағы қазіргі жағдай өте күрделі. Облыстағы 75 мектептің 109 сыныбы қашықтан оқу форматына ауысқан. Деректерге қарағанда, коронавирустың соңғы штамы білім ордаларында жайылып бара жатқанын байқауға болады. Оқушылардың саны көп мектептерде қатаң санитарлық талаптар сақталуға тиісті. Әзірге карантинге толығымен жабылған мектептер жоқ. Соңғы тәулікте мектеп оқушылары арасында 127 жағдай тіркелген. Оқу жылының басынан бері білім ошақтары қызметкерлері арасында 744 оқиға анықталды. Демек мектептегі санитарлық сақтық шаралары әлі де талапқа сай емес.
Дерт қаупі өте күшті екенін тағы бір еске салуға тура келеді. Жаңа жылдан бері індеттен облыстың 17 тұрғыны көз жұмды. Өткен аптаның өзінде ғана 6 404 адамның коронавирус індетінің қармағына іліккені белгілі болып отыр. Күн сайынғы денеңді түршіктіретін деректерді саралайтын болсаңыз, қауіптің күннен күнге күшейіп келе жатқанын байқауға болады. Осы сала мамандарының пікіріне сүйенсек, пандемия басталғалы індеттің мұншалықты өсу көрсеткіші болмаған.
– Жағдай өте күрделі, – дейді облыстық денсаулық сақтау басқармасының басшысы Нариман Сыздықов, – ауруханаларда төсектік орындар жеткілікті болғанымен, індеттің тез тарайтыны соншалық, қауіп күшейе түскен. Бұрын дайындалған төсектік орындардың 50 пайызы толып қалған.
Басқарма басшысының айтуына қарағанда, басты себеп – екпе алудан жалтару. Ал адамдарға екпе жасап, қауіптің бетін қайтаруға толық мүмкіндік бар. Өткен жылдан бері өңірге 1 млн-нан астам вакцина дозасы жеткізілген. Жыл басынан бері «Спутник Lite» вакцинасының 4 мың дозасы алынған. Солай бола тұра, жаппай екпе алып, тұтас қауіпсіздікті қамтамасыз ету жағы әлі де кемшін. Сөз арасында 226 мыңнан астам облыс тұрғыны мүлде екпе алмағанын айта кету керек. Олардың 3,7 пайызы, яғни 8 747 адам індет жұқтырып отыр. Ал екпе алғандар арасында биыл 343 адам сырқатқа шалдыққан. Екпе алған адамдардың ешқайсысы жан сақтау бөліміне түспегенін ескерсек, қауіпсіздік шарасының тиімділігі көзге көрініп тұр.
«Қызыл» аймақтың құрсауындағы індет демігіп тұр. Соңғы деректерге қарағанда, 40-қа жуық науқас жан сақтау бөлімінде жатыр. Екпе елді аман алып қалатын бірден бір жол екенін естен шығармаған жөн.
Ақмола облысы