Бірінші ауыр салмақ дәрежесінде бақ сынап жүрген ресейлік кәсіпқой боксшы Евгений Тищенко WBA рейтингінде үздік он бес боксшының қатарына енді, деп хабарлайды Egemen.kz championat.com-ға сілтеме жасап.
Ресейлік боксшы соңғы жекпе-жегінде отандасы Дмитрий Кудряшовтан айласын асырып, WBC international белдігін иеленген еді. Жалпы ол кәсіпқой рингте өткізген он жекпе-жегінің біреуінде жеңілістің кермек дәмін татса, қалған тоғызында қарсыластарынан басым түскен.
Естеріңізге сала кетейік, Евгений Тищенко Рио Олимпиадасының финалында отандасымыз Василий Левитпен кездескен болатын. Аталмыш жекпе-жекте қазақстандық боксшы айқын басымдыққа ие болса да, төрешілер көпе-көрінеу шешім шығарып, ресейлік боксшыны Олимпиада ойындарының жеңімпазы деп таныған еді.