Қоршаған ортаға өндіріс ошақтарын айтпағанда, өзіміз қаншалықты зиян келтіріп жатқанымызды білеміз бе осы? Базаршылап жүріп, азық-түлік толтырған полиэтилен пакеттер ертеңгі күні желмен ұшып, жасыл желектің бас жағынан желбірейді. Пластик бөтелкелер өзен-көлдердің жағалауында жайрап жатады. Оның зияны айтпасақ та түсінікті.
Пластиктен құтылу – әлемді алаңдатқан мәселе. Ал бұл тығырықтан шығудың жолы – эко-дорба. Шүберектен тігілген дорбаға азық-түлік салсаң да, асай-мүсейіңді салсаң да болады. Кезінде сол шүберек дорбаны арқалап-ақ керек-жарағымызды жеткізіп алатын едік. Сол уақытта шашылып жатқан целлофан көрмейтінбіз, рас. Қазір ғой, дүкеннен алған жұдырықтай затты да полиэтилен пакетке тықпыштап, қолға ұстатады.
Жуықта экологияға төнген қауіпті азайту мақсатында А.С.Пушкин атындағы кітапхананың Maker Space шығармашылық алаңында «Эко сөмке тігеміз» атты шеберлік сабағы өтті. Шеберлік сабағы шүберекті пішу және тігу курсы негізінде ұйымдастырылды.
– Біздің шеберлік сабағымыз қоршаған ортаны қорғауға бағытталған. Біз шеберлік сабағында эко сөмкені ең оңай жолмен жасауды көрсеттік. Бұл күні қала тұрғындары кітапханаға келіп, матадан эко сөмке тігіп алып жатты, – дейді киім дизайнері Жаннұр Бақыт.
Мұндай мүмкіндікті қалалықтар қалт жібермеуге тырысты. Шеберлік сабағына келгендер өз талғамдарына сай қызылды-жасылды дорба тігіп, мәз болды.
– Тұрғындардың бәрі базарға барғанда дорбаларын ала барса, полиэтилен пакеттің керегі де болмайды. Бұл дегеніміз – ертеңгі күні айналамызда шашылып жатқан пакетті азайтамыз. Менің ойымша, бұл – үлкен жобаның бастамасы. Дорба тігу болмашы дүниедей көрінгенімен, қоршаған ортаның ластанбауына үлкен септігін тигізеді, – дейді шеберлік сабағына қатысқан қала тұрғыны Аяужан Утеулинова.
Әнеки, қарапайым қол дорбаның пайдасы қандай?! Табиғатқа пайдамыз тимесе де, зиянымызды тигізбеудің жолы бұл. Ендеше, ел болып, дүкеннің полиэтилен пакетінен бас тартуымыз керек шығар. Мүмкін болса, әрине...
ӨСКЕМЕН