Испанияда өткен велошабандоздардың «Валенсия Вуэльтасы» көпкүндігі өз мәресіне жетті.
93 жылдық тарихы бар жарыстың соңғы бесінші турында нидерландтық Фабио Якобсен (Quick-Step Alpha Vinyl Team) алдына жан салмады. Италиялық Элиа Вивиани (INEOS Grenadiers) мәре сызығын екінші болып қиып өтсе, норвегиялық Александер Кристофф (Intermarché – Wanty – Gobert Matériaux) үшінші сатыға табан тіреді. Ал қорытынды есепте Александр Власовтың алдына ешкім түсе алмады. BORA – hansgrohe клубы сапында өнер көрсетіп жүрген 25 жастағы спортшы былтыр ғана «Астананың» намысын қорғағанын қазақстандық жанкүйерлер жақсы біледі. «Валенсия Вуэльтасындағы» Власовтың көрсеткіші – 18:56:45. Жарыс жеңімпазынан 32 секунд қалып қойған бельгиялық Ремко Эвенепул (Quick-Step Alpha Vinyl Team) екінші орын алса, испаниялық Карлос Родригес (INEOS Grenadiers) үшінші сатыға жайғасты.
«Астана» клубы мүшелері арасынан ең үздік нәтижеге Давид де ла Крус қол жеткізді. Александр Власовтан 2 минут 28 секунд қалып қойған испаниялық легионер тоғызыншы орынды қанағат тұтты.