Жоғалып кете жаздап барып қайта жанданған құндылықтың бірі – саятшылық. Бабадан қалған мұраны зерттеп жүргендер осыдан 40 жыл бұрын елімізде құс салатын оншақты-ақ адам қалғанын айтады. Ал қазір 200-ге жуық құсбегі бар. Тағы бір айта кетерлігі, бұрынғылар бүркітті ғана баулыған болса, қазіргі жастар арасында қаршыға, ителгі, лашын, бидайық сияқты құстарды қолына қондырғандар көбейген.
Жуырда Жаңақорған ауданында саятшылықтан республикалық чемпионат өтті. Ересектер арасындағы XV чемпионатқа еліміздің 2 қаласы мен 10 облысынан саятшылар қатысты. Ұлттық спорттың осы түрінен Қызылорда облысында алғаш ұйымдастырылып отырған сайыс қонақтары жетісулық ардагер саятшылар Әбдікәрім Түсей мен Шаймардан Әден, аға жаттықтырушы Базарбек Күнтуғанұлы, «Қыран» федерациясының президенті, Қазақстанның құрметті спорт қайраткері Бағдатхан Мүптекеқызы жарысқа қатысушыларға сәттілік тіледі.
Қазір Қазақстандағы ұлттық спорт мектептерінің жанынан құсбегілікке баулу сабақтары ұйымдастырылған. Осының арқасында атадан қалған өнерге қызығушы жастар қатары көбейіп отыр.
– Әсіресе Алматы, Жамбыл, Түркістан облыстарында мектеп жанындағы құсбегілік бөлімдері жастармен жұмысты жолға қойған. Мақсатымыз – осындай шараларды жиі ұйымдастырып, саятшылықты ат бәйгесі, жамбы ату, көкпар сияқты дамып кеткен ұлттық спорт түріне теңестіру, – деді Бағдатхан Мүптекеқызы.
Қаратау баурайында қыран қалықтатқан сайыста Түркістан облысынан келген Сейдулла Паңның қаршығасы алғырлық көрсетіп, бас жүлдені иеленсе, маңғыстаулық Айшуақ Таймановтың ителгісіне бірінші орын берілді.
Бүркітшілер сайысында Атырау облысынан келген құсбегі Ақберен Құрманалиевтің қыраны бас жүлдені жеңіп алды. Облыс әкімдігі, дене шынықтыру және спорт басқармасы, Жаңақорған ауданы әкімдігінің ұйымдастыруымен өткен чемпионатта екінші, үшінші орын иеленген құсбегілер де марапат төрінен көрінді.
Қызылорда