Бұл күндері Түркияның Ыстанбұл қаласында күрес түрлерінен Яшар Доғу, Вэхби Эмре және Хамит Каплан сынды даңқты балуандарды еске түсіруге арналған халықаралық турнир өтіп жатыр. Аталған жарыста әлемнің көптеген мемлекетінен келген дүлдүлдермен қатар біздің елдің өрендері де бақ сынауда.
Жоғарыда аталған үш азаматтың да есімдері әлемдік спорт тарихында алтын әріптермен жазулы. Мәселен, Яшар Доғу – ІІ Дүниежүзілік соғыс аяқталған тұста Түркия спортының символына айналған тұлға. Ол еркін күрестен 1948 жылы Лондон Олимпиадасының жеңімпазы және әлем және Еуропаның екі дүркін чемпионы атанды. Грек-рим күресінен құрлық біріншілігінде бір алтын және бір күміс медаль олжалады. Хамит Капланның да халықаралық аренада қол жеткізген табыстары толағай. Ол да күрестің екі түрін жетік меңгерді. Хамит қатарынан үш Олимпиадада (1956 жылы – алтын, 1960 жыл – күміс, 1964 жыл – қола ) олжаға кенелді. Капланның әлем чемпионы және әлем кубогының иегері деген атақтары тағы бар. Вэхби Эмренің де бағындырған белестері бір төбе. Міне, өткен аптада Анадолы елінің абыройын осындай даңқы алысқа жайылған саңлақтардың мемориалында төрткүл дүниенің белді балуандары бас қосты.
Жарысты грек-рим күресі шеберлері бастады. Алғашқы күні 60 кило салмақта белдескен ағайынды Фидахметовтер өз жанкүйерлерін қуантты. Бастапқы бәсекелерде қарсыластарын қапы қалдырған қос жерлесіміз жартылай финалда өзара шеберлік байқасты. Бұл тартыс Ернардың пайдасынан шешілді. Финалда ол Екрем Өзтүрікті ойсырата ұтып, бас жүлдені олжалады. Тағы бір жергілікті спортшы Ахмет Ұқарды ұтқан Ернат қола медаль иеленді.
55 кило салмақта күрескен Аманғали Бекболатов ақтық сынға дейін алқынбай жеткенімен, шешуші тұста Түркияның мықтысы Әдем Бұрақ Ұзынға есе жіберді. Алғашқы айналымдарда әзербайжандық Намаз Рустамов пен өзінің командалық әріптесі Данияр Қаленовтен айласын асырған, 67 кило салмақтағы Мейіржан Шермахамбет жартылай финалда Еуропа чемпионы, норвегиялық Мортен Торесенге жол берді. Үшінші орын үшін тартыста қырғызстандық Қалы Сулейменовке сан соқтырған қандасымыз қола медальды мойнына ілді.
Келесі күні тағы үш салмақ дәрежесінің жүлделерін сарапқа салынғанымен, тек Темірлан Шадукаев жүлдегерлер санатынан көрінді. 77 кило салмақтың қола медалі үшін бәсекеде ол әлем чемпионы, сербиялық Виктор Немештен басым түсті. Сол кеште Демеу Жадыраев (77 кило) және Ильимдор Сатаев пен Рахмет Сәпиевтің (82 кило) де жеңіс тұғырына көтерілуге жақсы мүмкіндіктері болды. Бірақ шешуші тұста өз қарсыластарына есе жіберген бұл балуандар бесінші орындарды қанағат тұтты.
Грек-рим күресінен өткен жарыстың жеңімпаздары:
55 кило – Әдем Бұрақ Ұзын (Түркия), 60 кило – Ернар Фидахметов (Қазақстан), 63 кило – Исломжон Бахрамов (Өзбекстан), 67 кило – Махмұд Бахшилоев (Өзбекстан), 72 кило – Селжук Кан (Түркия), 77 кило – Юнус Эмре Башар (Түркия), 82 кило – Бұрхан Ақбодақ (Түркия), 87 кило – Ислам Аббасов (Әзербайжан), 97 кило – Руслан Ассақалов (Өзбекстан) және 130 кило – Ислам Йылдырым (Түркия).