Дүниежүзілік Азаматтық қорғаныс күні аясында ертең, 1 наурыз күні сағат 09:00-ден 12:00-ге дейін Қазақстан Республикасы бойынша азаматтық қорғаудың құлақтандыру жүйесін тексеру жоспарланған. Бұл туралы ҚР Төтенше жағдайлар министрлігі хабарлады, деп жазады Egemen.kz.
«Осыған байланысты Қазақстан Республикасының барлық азаматтарына құлақтандыру жүйесін тексерудің әлемде болып жатқан геосаяси жағдайға қатысы жоқ екенін хабарлаймыз. Бұл табиғи және техногендік сипаттағы төтенше жағдайлар туындаған жағдайда ел азаматтарының қауіпсіздігін қамтамасыз ету мақсатындағы жыл сайынғы іс-шара», деп түсіндірді ҚР ТЖМ ақпараттандыру, цифрландыру және байланыс департаменті.
Сондай-ақ бөлім азаматтарды дыбыстық сигнал кезінде сабыр сақтауға шақырды.
«Сонымен қатар қауіпті өндірістік объектілер мен гидротехникалық құрылыстардағы жергілікті құлақтандыру жүйелерінің жарамдылығы тексерілетін болады», деп қосты департамент.