Испаниялық теннисші, үлкен дулыға жарыстарының 21 дүркін жеңімпазы Рафаэль Надаль тағы бір рекорд орнатты, деп хабарлайды Egemen.kz.
Индиан-Уэллс додасының жартылай финалында отандасы Карлос Алькараспен кездескен Рафаэль Надаль 3 сағат 12 минутқа созылған кездесуде қарсыласынан айласын асырып, ақтық сынға жолдама алды. Бұл ашық алаңдағы жарыстарда Рафаэль қол жеткізген 954-ші жеңіс болатын. Осылайша ол бұған дейін 953 мәрте қарсыластарынан айласын асырған әйгілі Роджер Федерердің рекордын жаңалады. Енді Надаль финалда АҚШ спортшысы Тейлор Фритцпен кездеседі.