Мемлекет басшысы Қасым-Жомарт Тоқаевтың Жолдауында елдің саяси жүйесін жаңғырту мәселесі орнықты баяндалып, «күшті Президент – ықпалды Парламент – есеп беретін Үкімет» формуласын берік ұстану арқылы мемлекетті демократияландыру үдерісіндегі Президенттің өкілеттілігін қысқарта отырып, Парламенттің төменгі палатасының құзыретін жоғарылату елдің тұрақты жан-жақты дамуына әкеліп, ішкі саяси тұрақтылықты сақтайтыны сөзсіз.
Сонымен қатар Мемлекет басшысы бірқатар өзгеріс туралы айтты. Бұл кезең тарих беттеріне жазылып, ел дамытудың жаңа бағытының – Жаңа Қазақстанның бастауы болады.
Президент халықтың пікіріне құлақ асып шешім қабылдағанын жеткізді. Соның ішінде жаңадан облыстар құрылуының, оларға Абай, Ұлытау, Жетісу сияқты атау берілуінің астарында зор мағына бар. Ерекше бір айта кететіні, Қапшағайдың атауын аса көрнекті мемлекет және қоғам қайраткері Дінмұхамед Қонаевтың атына беруді ұсынды.
Халықтың пікіріне құлақ асатын биліктің әрдайым мәртебесі жоғары болады деп ойлаймыз. Барлығы бірден болуы мүмкін емес, сол үшін атқарылатын жұмысты, алға қойылған ауқымды міндеттерді қоғам болып, ел болып бірге еңсерейік, Жаңа Қазақстанды бірге құрайық!
Руслан ХАМЗА,
Мемлекеттік рәміздерді насихаттау жөніндегі ұлттық орталықтың атқарушы директоры
Атырау