Рухани азықтың уызы

Әлеуметтік желінің бағы жанып тұр дегенімізбен, газет-журналға деген ел ықыласы суымаған екен. Көзімізбен көріп, көңіліміз тоғайды. Іс-шараға қатысқан қауым ішінде, әсіресе аға буынның қатары мол. Республикалық басылымдардан бастап, облыстық, қалалық мерзімдік басылымдар туралы, оларда үздіксіз жарияланып жатқан, оқырмандардың рухани жан-дүниесіне телегей-теңіз нәр беретін материалдар хақында, жалпы, әр басылымның ұстанымы, алдына қойған асқаралы міндеті, бет алысы, көздеген көкжиегі, қаузаған дүниесі туралы кесек-кесек ой айтылды. Осы жолдардың авторы, жүз жылдық тарихы бар ел газеті – «Егеменнің» бүгінгі бағыты туралы сөз өнерін қадір тұтатын қауымға егжей-тегжей түсіндіріп, таратып айтып берді.

Біздің сөзімізді тірілткен ел ақса­қал­дары­ның бірі, байырғы журналист Сайлау Көшкенов бас басылымда жария­лан­ып жат­қан толғамды тақырыптарды қам­титын тарихи материалдардың, уақыт тозаңы тұмшалаған шаңынан аршып алып, Алаш баласының түпкі тарихына қатысты түгел сөздің төркінін сипаттайтын тамаша дүниелерді мысал ете отырып, өз ойын білдірді. Жыл басында жазылуға мүмкіндігі болмай қалғандар өз өкініштерін де айтып, осы жартыжылдықтан бастап жазылғалы келгендіктерін жеткізіп жатты. Ықыластарына қарағанда, бас басылымға және өзге де бұқаралық ақпарат құралдарына деген оң көзқарас бар екен. Жазған сөзіміздің діттеген жеріне жететіндігін түйсінген сайын көңіл өсіп, қаламыңды құшырлана сілтегің келеді.

«Өткен жылдың соңында қаржы тапшы­лығына байланысты жазыла алмап едік, – деді облыс орталығындағы жоғары оқу орнының басшысы. – Биыл нәубет жыл­дарындағы ел басынан кешірген алапат оқиғаны сипаттайтын бір материалды іздеп, қаншама әуре болдық. Енді уақытында жаз­дырып алуға ұмтылып отырмыз».

«Егеменнің» ел іздеп жүріп оқитын басылым екендігін осы бір жалғыз ауыз сөзден аңғаруға болады. Әрі бүгінгі бағыты көпшіліктің көкейіндегі сұранысты дөп басып отыр.

Жиын барысында жергілікті газет-жур­налдарға тегін жазылу ұйымдастырылып, лотерея ойнатылды. Республикалық «Казах­станская правда» газетінің төрт сыйлығы ұтыс ойындарында бағы жанған облыстың әр түкпірінде тұратын жаздырып алушыларға жөнелтілді. Сыбағалы сый­лықтың ішінде ықшам, әдемі қолсөмке де бар. Сыртына басылымның атауы жазылыпты. Кәдімгідей көзтар­тарлық. Қолына ұстап жүрген адам жаяу жүріп жарнама жасап бара жататындай. Ең бастысы, ел ықыласы ескерілді. Басылым мен оқырман арасындағы нәзік байланыстың арқауын бекіте түскендей.

«Өткен жылғы басылымдарға жазылу науқаны ауырлау өтті, – дейді «Қаз­пош­та» акционерлік қоғамының облыс­тық фи­лиалының басшысы Қайрат Бекенов. – Бірақ біз басылымның өкіл­дерімен бірлесе отырып, біраз жұмыс істедік. Қалай болған күнде де адамдар газет оқуы керек қой. Қазір шалғайдағы шағын ауылдардағы пошта жұмысын жандандыруға күш салып жатырмыз. Пошта қызметкерлерінің еңбекақысы да өсті».

Көп болып илеген бір терінің пұш­пағы көздеген мақсатына жетсе, заман­дас­тарымыздың рухани әлемін жарқырататын, нәрлендіретін азықтың уызы молая түспек.

Көкшетау