Ұлттық банктің ақша-кредит саясаты департаменті нақты сектор мониторингі басқармасының бастығы Игорь Осипов Қазақстан өңірлеріндегі инфляциялық үрдістер туралы айтып берді, деп хабарлайды Egemen.kz.
«2022 жылғы наурызда елде жылдық инфляция 12%-ды (ақпанда - 8,7%) құрады. Өңірлер бөлінісінде жылдық инфляция барлық 17 өңірде жеделдеді», деді И. Осипов.
Оның мәліметінше, ең жоғары жеделдету Ақтөбе облысында (ақпан айында 9%-дан наурыз айында 12,9%-ға дейін) және Шымкентте (8,5%-дан 12,4%-ға дейін) тіркелген.
«Наурызда азық-түлік тауарлары бағасының өсу қарқыны 15,4%-ға дейін өсті (ақпанда - 10%). Осы топтың тауарлары бағасының ең жоғары өсуі Ақтөбе облысында қалыптасты (18,5%). Азық-түлік емес тауарлар бағасының өсу қарқыны да 10,9%-ға дейін өсті (ақпанда - 8,6%). Ең жоғарғы мәні Ақмола облысында (12,4%), ал ең төменгі мәні Батыс Қазақстан облысында (9,2%) тіркелген», деп қосты ол.