Алматыда тау бөктеріндегі қар жамылғысының тұрақсыз жағдайына, сондай-ақ, Кіші және Үлкен Алматы өзендерінің бассейндерінде күтілетін жауын-шашынға байланысты 19-22 сәуір кезеңінде қар көшкінінің түсу қаупі сақталады, деп хабарлайды Egemen.kz.
Қалалық ТЖД баспасөз қызметінен хабарлағандай, Алматы аймағы бойынша барлығы 165 көшкін қаупі бар учаскелер бар.
2022 жылы жалпы көлемі 83 мың текше метрден асатын 26 профилактикалық түсіру жүргізілді.
Сонымен қатар жалпы көлемі 400 мың текше метрден асатын қар көшкінінің өздігінен түсуінің 130-дан астам жағдайы тіркелді.
Осыған байланысты қалалық ТЖД алматылық туристерге барынша абай болып, тауға барудан бас тартуды ұсынды.